A veciñanza do barrio de Santa Marta, preocupada pola situación de inseguridade xerada pola existencia de puntos de venda de drogas, reclamou o compromiso urxente do goberno municipal, a comisaría de policía e outras administracións públicas para abordar esta problemática. Nunha asemblea veciñal celebrada este martes 21, os residentes debateron sobre as consecuencias negativas que a venda de drogas está a ter no barrio, destacando non só os riscos directos para a seguridade senón tamén o impacto social que require unha resposta coordinada.
Os asistentes á reunión destacaron a importancia de entender este problema como unha cuestión social que esixe unha actuación dos servizos sociais adaptada á realidade actual. A preocupación tamén se centra na proliferación de xiringas en lugares públicos sensibles como parques infantís e a presenza de consumidores nas rúas próximas ao Complexo Hospitalario Universitario de Santiago, o que subliña a urxencia de medidas efectivas.
Durante a asemblea, decidiuse reiterar a petición de reunións co comisario de Policía Nacional de Santiago, co concello e con outras administracións involucradas. Tamén se acordou solicitar un aumento da presenza policial no barrio e melloras na iluminación en puntos críticos para mellorar a seguridade. Ademais, a asociación veciñal quere involucrar a xerencia da área sanitaria de Santiago e a USC na busca de solucións conxuntas a este problema de saúde e seguridade pública.
Os veciños e veciñas de Santa Marta expresaron a súa intención de mobilizarse se non se toman medidas eficaces. Confían en recibir unha resposta adecuada das autoridades para resolver de forma definitiva esta problemática que afecta tanto á seguridade como ao benestar social do barrio.
