Milleiros de manifestantes reclamaron en Santiago de Compostela o “fin do xenocidio en Palestina” e a “imposición de sancións” a Israel. “Do río ata o mar Palestina vencerá“, enfatizaron. A marcha, convocada pola plataforma Galiza pola Paz e a asociación Galiza por Palestina baixo o lema “Galiza con Palestina. Resistencia, liberdade e paz”, contou co apoio de máis de 60 entidades. Así mesmo, sumáronse a ela o deputado do BNG no Congreso, Néstor Rego, e a alcaldesa compostelá, Goretti Sanmartín.
As manifestantes e os manifestantes saíron ás 12.00 horas da Alameda e percorreron o casco vello da localidade, con destino á Praza de Praterías, onde tivo lugar a lectura dun manifesto. Ao longo da marcha berraron diferentes consignas como “Do río ata o mar Palestina vencerá” e “Onde están que non se ven, as sancións a Israel”. En declaracións aos medios, a voceira de Galicia por Palestina, Ánxela Gippini, puxo o foco no “silencio mediático sobre o que está a acontecer en Gaza”, onde o “xenocidio continúa”.
“Vai facer un ano da presentación do plan de paz, que sabemos que foi un falso plan de paz presentado para desactivar a mobilización global. En Galicia denunciamos que non se fixo máis que asfixiar, continuar co asasinato de palestinos, non só en Gaza, senón en toda Palestina”, denunciou Gippini. Pola súa banda, o voceiro da plataforma Galiza pola Paz, Rafa Vilar, salientou a asistencia multitudinaria que “demostra unha vez máis a histórica posición do pobo galego ao lado do pobo palestino, que continúa loitando pola paz e pola súa liberdade”.
“A causa palestina é a causa da humanidade. A sociedade galega leva tempo demostrando que está no lado correcto da historia manifestándose a favor de Palestina”, afirmou.
APOIO DO BNG
Uns momentos antes de comezar a marcha, o deputado do BNG no Congreso, Néstor Rego, insistiu perante os medios en que “non hai que deixar de falar de Palestina” e chamou a “seguir denunciando o xenocidio” cometido por Israel. Ademais, reafirmou o apoio da formación a esta mobilización “absolutamente necesaria”. “Hai que seguir reclamando que os criminais como Netanyahu paguen perante a Corte Penal Internacional. É realmente incomprensible que a chamada comunidade internacional e a Unión Europea non só non fagan nada, senón que sexan cómplices”, enfatizou.
