O espazo natural recuperado da Lagoa de Cornes pasará a levar oficialmente o nome de Rosa Bassave o vindeiro venres 11 de setembro, nun acto institucional co que Santiago de Compostela lembrará a traxectoria da feminista e anarcosindicalista. A homenaxe comezará ás 18:00, estará aberta á veciñanza e incluirá a colocación dunha placa no lugar.
O acto estará presidido pola alcaldesa de Santiago, Goretti Sanmartín, e contará coa participación de Alberte de Esteban, viúvo de Rosa Bassave; Sabela Losada, en representación do movemento feminista; e Pancho Valle-Inclán, da CNT. Familiares e representantes dos colectivos cos que Bassave mantivo unha estreita vinculación ao longo da súa vida tomarán así parte no recoñecemento.
A decisión de denominar este espazo da Lagoa de Cornes como Rosa Bassave foi adoptada pola Comisión de Honra e Condecoracións do Concello, que tivo en conta a súa implicación en diferentes ámbitos da vida social e política compostelá. Entre eles figura especialmente a súa participación no movemento feminista e no proceso que desembocou na creación da Marcha Mundial das Mulleres.
A súa actividade estivo tamén ligada ao anarcosindicalismo. Bassave formou parte da refundación da CNT en Compostela e chegou a converterse na primeira muller que asumiu a secretaría do sindicato en Galiza, unha responsabilidade que se suma á súa participación durante anos en diferentes iniciativas sociais.
A homenaxe tamén lembrará a súa faceta como autora e colaboradora en medios e publicacións. Baixo o pseudónimo María Balteira, escribiu en cabeceiras como Andaina, Festa da Palabra Silenciada, A Nosa Terra ou @narquista, esta última entre 1998 e 2004.
Os seus textos abordaron cuestións vinculadas coa situación das mulleres e co feminismo, pero tamén outros asuntos como a loita de clases, o reintegracionismo, a solidariedade internacionalista ou a recuperación da memoria. Esta actividade desenvolveuse paralelamente á súa carreira profesional, na que exerceu como directora da Biblioteca da Facultade de Matemáticas da Universidade de Santiago de Compostela.
A programación do recoñecemento completarase cunha actuación de Som do Galpom, grupo musical do que forman parte dous dos fillos de Rosa Bassave. A formación interpretará durante o acto as pezas Rosa do deserto e Himno das barriadas.
