A acampada de representantes de traballadoras e traballadores do sector téxtil contra o convenio estatal de Arte trasladouse este martes a Santiago de Compostela despois de permanecer durante 15 días diante da sede da patronal na Coruña. A mobilización instalouse na zona vella compostelá, ás portas da Confederación de Empresarios de Galicia (CEG), coincidindo coa celebración da súa asemblea.
Varias decenas de persoas concentráronse na Rúa do Vilar, onde abriron tendas de campaña e colocaron mesas, nunha protesta que se desenvolveu baixo a vixilancia dun amplo dispositivo policial. A mobilización tivo lugar nunha xornada na que estaba prevista a asistencia, no peche da reunión da CEG, do delegado do Goberno en Galicia, Pedro Blanco, e da alcaldesa de Santiago, Goretti Sanmartín, arredor das 13:30.
As persoas participantes na protesta berraron consignas como “ata negociar non imos parar”, “Convenios aquí e non en Madrid”, “Da Rúa do Vilar non nos moverán”, “A vosa empanada para a nosa acampada” ou “Ortega, escoita, o téxtil está en loita”. Despois dun primeiro momento de concentración de pé, parte das persoas mobilizadas optaron por sentar na rúa, onde tamén estenderon unha pancarta coa mensaxe “Non podemos perder nada. Non ao convenio de Arte”.
A protesta estivo acompañada por asubíos, sirenas e o son dun tambor, mentres as representantes do sector reclamaban a apertura dunha negociación e expresaban o seu rexeitamento ao convenio estatal. Entre as consignas máis repetidas tamén figurou “Acordo marco galego xa”, unha demanda que xa estivera presente nas mobilizacións anteriores.
A mobilización desenvolveuse nunha das rúas máis transitadas do centro histórico de Santiago, pola que durante a mañá pasaron numerosos veciños, veciñas e turistas. As persoas concentradas denunciaron estar “fartas de ser explotadas” e defenderon a continuidade da protesta ata que se abra unha negociación sobre as condicións laborais do sector.
