O líder do Partido Popular de Santiago, Borja Verea, participou este luns na concentración convocada na Praza Roxa por veciños e colectivos do Ensanche para reclamar actuacións fronte ao que consideran un aumento dos problemas de inseguridade en distintos puntos da cidade. Na mobilización tamén estivo presente o concelleiro popular José Ramón de la Fuente.
Durante a concentración, Verea afirmou que a demanda dunha cidade máis segura é unha cuestión que transcende as siglas políticas e que afecta directamente á convivencia cidadá. Segundo indicou, a seguridade e o coidado do espazo público deben abordarse desde a prevención, a coordinación entre administracións e a xestión municipal.
O portavoz popular sostivo que existe unha preocupación crecente entre parte da veciñanza e advertiu de que ignorar ou minimizar os problemas non contribúe a resolvelos. “Nós non queremos alarmar. O que pedimos é actuar. E iso é o que están reclamando cada vez máis veciños da cidade”, sinalou.
Verea tamén cuestionou a postura do Goberno municipal, formado por BNG e Compostela Aberta, ao considerar que transmite a idea de que a situación non ten solución. Pola contra, defendeu que Santiago pode mellorar os seus niveis de seguridade mediante políticas específicas e medidas de reforzo dos servizos públicos.
Neste sentido, o deputado autonómico asegurou que outras cidades lograron avances neste ámbito e preguntouse por que non sería posible aplicar solucións semellantes en Compostela. Ademais, criticou a ausencia de representantes do executivo local na mobilización convocada polos residentes do Ensanche.
O líder popular insistiu en que o debate non debe centrarse nos corpos de seguridade nin no persoal municipal, senón na dotación de máis recursos e na definición de prioridades políticas. Segundo afirmou, son necesarias decisións acompañadas de medios económicos para afrontar os problemas detectados pola veciñanza.
Verea subliñou que a concentración non foi impulsada polo Partido Popular, senón por residentes e pola asociación veciñal do Ensanche, e asegurou que a súa formación acudiu para escoitar as súas reivindicacións. Na súa intervención, sostivo que existe unha percepción de deterioración do espazo público acumulada ao longo dos últimos anos e comprometeuse a impulsar medidas correctoras se o PP accede ao Goberno municipal tras as próximas eleccións.
“Os veciños están cansos de ver como se deteriora o seu espazo público e como nos últimos cinco, dez ou quince anos ese deterioro foi en aumento. O noso deber é acompañar, escoitar e prepararnos para, se así o deciden os cidadáns a partir do ano que vén, poñer solucións desde o minuto un”, concluíu.
