O Consello do Estudantado da Universidade de Santiago de Compostela fixo pública a súa condena pola agresión homófoba denunciada por dous mozos o pasado 12 de maio en Santiago de Compostela, uns feitos difundidos a través das redes sociais e que, segundo o relato das vítimas, tiveron lugar mentres camiñaban pola zona vella da cidade.
Segundo trasladou o órgano de representación estudantil, os afectados foron increpados con insultos homófobos, ameazas e unha posterior agresión física que acabou causando lesións a un dos mozos. O Consello cualificou o sucedido como “absolutamente intolerable” e advertiu de que este tipo de violencias non poden ser “minimizadas nin normalizadas baixo ningún concepto”.
Na súa declaración, o estudantado da USC subliña que o caso non debe interpretarse como un episodio illado, senón como parte dunha realidade máis ampla. Neste sentido, lembra que nos últimos meses tamén trascenderon publicamente en Santiago outras denuncias vinculadas a comportamentos violentos, acoso a mulleres e actitudes discriminatorias, unha reiteración que, ao seu xuízo, require “unha resposta social clara, contundente e colectiva”.
Desde o Consello considérase especialmente grave que este tipo de situacións continúen producíndose nunha cidade universitaria como Compostela, que sinalan debe ser “exemplo de convivencia, diversidade e respecto”. A entidade incidiu en que ningunha persoa debería sentir medo pola súa orientación sexual, identidade ou forma de expresarse.
O comunicado serve tamén para reafirmar o compromiso do órgano estudantil coa defensa dos dereitos do colectivo LGBTIQ+ e coa creación de espazos seguros tanto dentro como fóra da universidade. “A homofobia, a transfobia ou calquera forma de discriminación non teñen cabida nin na nosa institución nin na nosa sociedade”, sostén o texto.
Ademais de trasladar a súa solidariedade ás persoas agredidas, o Consello do Estudantado puxo en valor a importancia de facer públicas estas situacións, ao considerar que visibilizar as agresións resulta fundamental para combater a súa normalización e frear os discursos de odio. A entidade chama así a reforzar o compromiso colectivo coa diversidade e a convivencia nun contexto que considera preocupante para a cidade.
