A perda de preto de vinte contratos Ramón y Cajal na Universidade de Santiago de Compostela abriu unha nova fronte de crítica interna sobre o funcionamento dos servizos de apoio á investigación. O colectivo nacionalista do persoal técnico, de xestión e de administración e servizos, ‘A Trabe’, sostén que o sucedido non pode explicarse como un erro puntual de comunicación, senón como a consecuencia dunha situación estrutural de precariedade na organización administrativa vinculada á I+D.
Nun comunicado, o colectivo advirte de que este episodio revela “un problema de modelo” na universidade compostelá, no que a xestión investigadora depende en exceso da “boa vontade” e da responsabilidade individual do persoal, nun contexto marcado pola sobrecarga, a falta de estabilidade e a ausencia dunha planificación estratéxica sólida. Segundo denuncian, a situación dos servizos de investigación da USC leva tempo caracterizándose por escaseza de persoal, elevada rotación e insuficiente profesionalización, o que, ao seu xuízo, compromete a capacidade da institución para competir en convocatorias de alto nivel.
Desde A Trabe sinalan que a consecuencia inmediata desta perda non se limita ao plano administrativo, senón que afecta directamente á incorporación e continuidade de persoal investigador, con impacto sobre proxectos científicos, departamentos e institutos. Na súa análise, a situación repercute tamén na reputación da USC, na súa credibilidade institucional e na capacidade para atraer e reter talento investigador nun escenario cada vez máis competitivo.
O colectivo insiste en que a universidade pública precisa dunha estrutura de xestión da investigación equiparable á relevancia da súa actividade científica. Por iso, reclama estabilidade laboral real para o persoal de xestión da I+D, rexeitando o uso continuado de fórmulas temporais como solución estrutural; un reforzo dos cadros de persoal acorde ao volume de traballo; programas de formación técnica especializada para afrontar convocatorias complexas; e a implantación dunha cultura organizativa baseada en procedementos documentados, sistemas de coordinación e mecanismos de alerta.
A Trabe defende que a USC “pública, galega, democrática e de calidade” require fortalecer tamén os servizos internos que sustentan a actividade investigadora, e advirte de que non é viable manter estándares de excelencia científica sobre estruturas administrativas que consideran fráxiles. A denuncia sitúa así o foco non só na perda concreta destes contratos, senón no debate máis amplo sobre o modelo de gobernanza e soporte técnico da investigación na universidade compostelá.
