O vindeiro xoves 23 de abril ás 11:30 terá lugar en Santiago de Compostela un percorrido reivindicativo para denunciar as barreiras urbanas que dificultan a mobilidade de distintos colectivos na cidade. A iniciativa está promovida pola plataforma ‘Compostela accesible, xa!’, impulsada polo coordinador de UCIN Santiago, Diego Adrián Mallo.
A acción consistirá nun traxecto en cadeira de rodas entre a rúa Entrepexigos e a Praza do Obradoiro, co obxectivo de amosar de maneira directa os obstáculos cos que se atopan diariamente persoas con dificultades de mobilidade. Segundo trasladou o promotor da convocatoria, a actividade busca “visibilizar e mellorar o noso concello fronte ás dificultades que tantas persoas atopan cada día nas rúas”.
Na súa mensaxe, Mallo subliña que a iniciativa non está centrada nun caso individual, senón que pretende representar a unha ampla diversidade de situacións. “Este xoves non vai de min, vai de vós”, sinala, en referencia a colectivos como persoas con mobilidade reducida, cegueira, xordeira, autismo, discapacidade intelectual ou problemas de saúde mental, así como persoas maiores, embarazadas ou familias con carriños de bebé. Tamén inclúe no chamamento a profesionais que transportan mercadorías e que se ven afectados polas condicións do espazo público.
A plataforma destaca que a accesibilidade afecta tamén a persoas con enfermidades crónicas ou limitacións invisibles, incidindo na necesidade de deseñar unha cidade “sen barreiras, sen obstáculos e sen esquecemento”. Neste sentido, defenden que “a accesibilidade non é unha opción, é un dereito”.
O percorrido está aberto á participación da cidadanía e conta coa convite a partidos políticos e asociacións, coa intención de implicar diferentes axentes sociais na demanda de melloras. A convocatoria pretende así converterse nun espazo de encontro para trasladar de forma directa as problemáticas relacionadas coa accesibilidade no municipio.
Dende a organización animan á veciñanza a sumarse á mobilización, facendo fincapé na idea de que calquera persoa pode verse afectada por estas limitacións ao longo da súa vida, e reivindican un modelo de cidade que teña en conta esta diversidade de necesidades.
