O Concello de Santiago porá en marcha a partir deste mes o proxecto educativo ‘Compostela en Igualdade’, unha iniciativa dirixida ao alumnado de 2º, 3º e 4º da ESO coa que se pretende fomentar relacións baseadas na igualdade, o respecto e a prevención das violencias machistas. O programa foi presentado este xoves pola alcaldesa, Goretti Sanmartín, acompañada pola directora da área municipal de Igualdade, Clara Ortega, e pola nova directora do Centro de Información á Muller (CIM), Rita Barreiro.
Segundo explicou o goberno municipal, a proposta desenvolverase nos institutos composteláns que se inscriban unha vez aberto o prazo de participación. Nesta primeira edición poderán participar tres centros, nos que a formación se impartirá a un único curso por instituto, con contidos adaptados á idade do alumnado.
Durante a presentación, Sanmartín subliñou que o obxectivo da iniciativa é traballar co alumnado na construción de relacións afectivas baseadas na igualdade e no respecto á diversidade. “A idea é, neste caso, promover esas relacións igualitarias e libres buscando fomentar a igualdade de xénero, o respecto á diversidade e, sobre todo, desenvolver habilidades de comunicación emocional e de resolución de conflitos”, explicou.
A alcaldesa sinalou tamén que a elección do alumnado destas idades responde a un momento clave no proceso educativo e social. Segundo indicou, é unha etapa na que “se está xustamente forxando a personalidade” e na que comezan a consolidarse determinadas crenzas relacionadas co amor, os roles de xénero, os celos ou o consentimento.
SESIÓNS REPARTIDAS AO LONGO DE TODO O ANO
O programa estrutúrase nun itinerario formativo de seis sesións, impartidas por especialistas e distribuídas ao longo de todo o ano 2026. As tres primeiras terán lugar entre marzo e xuño, mentres que as restantes desenvolveranse entre setembro e decembro, co propósito de ofrecer continuidade ao proceso formativo e avaliar a evolución das aprendizaxes.
As actividades combinarán explicacións teóricas con dinámicas de grupo, análise de casos e exercicios participativos, co fin de facilitar a reflexión do alumnado sobre cuestións como os estereotipos de xénero, as dinámicas de control nas relacións de parella, a violencia de xénero ou o papel das redes sociais.
Ademais, o programa incluirá un consultorio dixital anónimo a través de WhatsApp, pensado para que o alumnado poida formular preguntas ou expresar preocupacións relacionadas cos contidos tratados nas sesións. “Non todas as cuestións poden tratarse en grupo, así que é lóxico deixar un espazo de consultoría dixital”, indicou Sanmartín.
O Concello prevé enviar ao longo deste mesmo día as invitacións aos institutos da cidade, tanto públicos como concertados, para que poidan sumarse a esta primeira edición do proxecto educativo. O goberno local enmarca esta iniciativa nas políticas municipais orientadas á promoción da igualdade e á prevención das violencias machistas entre a mocidade.
