A Plataforma SOS Sanidade Pública convocou unha concentración para o domingo 1 de febreiro en Santiago de Compostela para denunciar os “continuos colapsos” da sanidade pública galega. A manifestación, baixo o lema ‘Mobilízate para defender o teu dereito a saúde’ sairá da Alameda de Santiago e percorrerá varias rúas compostelás ata acabar na Praza do Obradoiro, onde se lerán os manifestos. Amenizará a manifestación Isabel Risco, coa actuación do grupo musuical De Ninghures.
“Consideramos que a destrución e privatización do Sistema Sanitario Público que está a facer o PP en Galicia leva a que: ou nos mobilizamos ou o sistema seguirá colapsado e en permanente destrución”, destacan nun comunicado. Neste contexto, citan as listas de agarda “interminables”, o acceso “imposible” aos centros de saúde e PACs, o “colapso” dos Servizos de Urxencias hospitalarios e a falta de profesionais e recursos, entre outros.
A manifestación tamén se presentou ante o centro de saúde de Barreiros. Alí anunciaron que haberá autobuses para acudir á manifestación. Segundo adiantou a coordinadora do colectivo, Montse Porteiro, a Plataforma Sanitaria da Mariña fretará autobuses desde Viveiro e Ribadeo. Para reservar praza habilitaron os teléfonos 982140654, 982581861, 667052058 e 629588833. O prazo para reservar praza acaba o xoves 29 de xaneiro ás 14 horas.
