As asociacións Compostela por Palestina e Galiza por Palestina, xunto con outros colectivos da cidade, convocaron para este domingo unha acción simbólica ás 20:00 na Praza do Obradoiro, en Santiago de Compostela. A iniciativa busca lembrar a coñecida como “matanza dos inocentes”, tradicionalmente asociada ao 28 de decembro, e poñer o foco na situación da poboación palestina.
Segundo explican as entidades convocantes, o acto pretende visibilizar as “dramáticas condicións” nas que vive a poboación palestina e render homenaxe ás vítimas. Para iso, convidan á cidadanía a acudir ao Obradoiro portando velas, nun xesto de carácter simbólico e colectivo. A mobilización quere expresar, unha vez máis, o rexeitamento á “ocupación de Palestina e ao xenocidio que sofre o seu pobo”.
Nun comunicado difundido polos organizadores, afírmase que “o ano 2025 foi outro ano devastador para os nenos e nenas palestinas”, que continuaron sendo vítimas de “xenocidio, fame, tortura, desprazamento masivo, desaparición forzada e violencia implacable”. O texto sinala directamente ás forzas de ocupación e aos colonos israelís como responsables desta situación.
A convocatoria inclúe tamén unha chamada de atención sobre a situación legal dos menores palestinos, que, segundo denuncian, seguen sendo obxecto de “detencións arbitrarias e tortura, moitas veces sen xuízo nin cargos”. Neste sentido, as asociacións instan á comunidade internacional a esixir o fin da “impunidade” e a reclamar que se “rendan contas” polos “crimes cometidos por Israel contra a poboación civil palestina”.
As entidades convocantes recollen que, ao longo de 2025, 54 nenos e nenas palestinas foron asasinadas en Cisxordania, nun contexto de “intensificación da represión”. Ademais, denuncian que en Gaza a “fame como arma de guerra” alcanzou niveis “sen precedentes”, nun escenario que describen como de “asedio total” á poboación civil.
