O Consello de Estudantado da Universidade de Santiago de Compostela fixo público este xoves o seu apoio ao alumnado da Facultade de Medicina, após o rexeitamento expresado pola Xunta de Facultade ao acordo de descentralización da docencia do grao. O órgano que representa ao conxunto do estudantado da USC considera que o documento aprobado o pasado 24 de novembro pola Facultade recolle “reivindicacións xustas” e insta a que sexan tidas en conta antes de avanzar nun cambio de modelo que cualifican de insuficientemente planificado.
Segundo recolle o posicionamento remitido polo Consello, o alumnado de Medicina trasladou unha serie de propostas destinadas a corrixir as carencias detectadas no acordo interuniversitario. Entre elas, solicita que se analice con rigor o impacto da descentralización na mobilidade e na equidade, así como a garantía de cumprir uns mínimos de calidade docente nas diferentes sedes.
Outro dos puntos salientados é a petición de atrasar a implantación do novo sistema, co obxectivo de asegurar unha transición ordenada e con marxe suficiente para planificar horarios, prácticas e recursos. O Consello destaca tamén a demanda de que ningún estudante sexa obrigado a realizar formación fóra de Santiago, especialmente no caso das promocións que xa iniciaron os seus estudos na capital galega.
O órgano estudantil subliña igualmente a necesidade de que a Comisión de Seguimento inclúa representación estudantil con voz e voto, e que se garantan mecanismos para evitar que quen teña materias pendentes doutros cursos se vexa nunha situación de prexuízo académico pola reestruturación da docencia.
Á vista destas consideracións, o Consello de Estudantado manifesta que tamén rexeita o acordo actual de descentralización, posto que, ao seu xuízo, non atende ás preocupacións trasladadas pola comunidade afectada. “Cando non se escoita ao estudantado nas negociacións que impactan directamente no noso día a día, os acordos son claramente insuficientes e non cobren as necesidades de quen os vai sufrir”, sosteñen no comunicado.
O posicionamento chega nun momento de debate interno na USC, no que a Facultade de Medicina, parte do estudantado e diversos colectivos universitarios teñen expresado reservas sobre o acordo pactado entre as tres universidades públicas galegas. O Consello reclama agora que se abra un proceso de revisión que teña en conta estas alegacións antes de continuar coa aplicación do novo modelo docente.
