As negociacións entre o Concello de Santiago e os sindicatos que representan aos corpos de bombeiros e policía localcontinúan abertas e con avances, segundo confirmaron fontes do Goberno municipal tras a reunión celebrada este luns. O executivo compostelán asegurou que “o diálogo segue avanzando” e que se prevé unha nova xuntanza este xoves, 13 de novembro, co obxectivo de seguir aproximando posturas.
Desde as organizacións sindicais explicaron que na sesión deste luns presentaron propostas concretas sobre o prezo das horas extraordinarias e a posibilidade de incorporar os complementos de festividade e nocturnidade ao soldo base. “Seguimos avanzando, aproximando posicións”, indicaron, ao tempo que precisaron que agora serán os técnicos municipais quen deberán “avaliar xuridicamente e economicamente” as propostas presentadas.
“O Concello ten que determinar se o prezo actual da hora extra é o correcto. Nós fixemos os cálculos e entregamos unha proposta para melloralo”, engadiron as fontes sindicais.
Mentres tanto, a situación operativa do Parque de Bombeiros de Santiago segue a ser motivo de preocupación. Este luns, segundo denunciaron os profesionais a través das súas redes sociais, o servizo contou só con catro efectivos —dous mandos e dous bombeiros—, cando o mínimo habitual debería ser de nove. “Onde deberían estar nove bombeiros preparados, só hai dous, e aínda así seguimos cumprindo coa nosa responsabilidade”, advertiron nunha mensaxe pública.
