A Asociación de Veciños da Volta do Castro volve denunciar o abandono do barrio e a falta de resposta por parte do Concello de Santiago e da empresa concesionaria do servizo de limpeza, Urbaser, ás peticións veciñais presentadas hai máis de dous anos. O colectivo lamenta que, malia as múltiples solicitudes formuladas, non se executaran as melloras comprometidas para recuperar o bo estado dos espazos públicos.
Segundo a asociación, as imaxes recollidas nas últimas semanas reflicten a situación de deterioro que sofren as rúas da zona, con espazos comúns sen limpar, árbores sen reposición, beirarrúas deterioradas e escaseza de papeleiras. “As imaxes falan por si soas e mostran unha deixadez evidente por parte do executivo local e da empresa responsable”, sinalan desde o colectivo veciñal.
A entidade lembra que xa no ano 2022 presentara un dossier con diversas propostas e incidencias rexistradas no ámbito do Rial, sen que ata o momento se materializasen actuacións de mellora. Por iso, reclaman agora ao Concello e a Urbaser que actúen con urxencia para garantir un mantemento axeitado da zona e atender as demandas dos residentes.
Desde a asociación insisten en que estas deficiencias non son casos illados, senón “a punta dun iceberg” dun problema estrutural de mantemento que, segundo denuncian, segue agravándose co paso do tempo. O colectivo mantén a súa disposición a colaborar co Concello para buscar solucións, pero advirte de que a veciñanza non pode seguir esperando indefinidamente por actuacións básicas de conservación e limpeza.
