O edificio Cersia Empresa acolleu este mércores o curso ‘Saber doar. A axuda humanitaria desde os concellos’, unha xornada formativa promovida polo Fondo Galego de Cooperación e Solidariedade, entidade da que forma parte o Concello de Santiago de Compostela. A sesión estivo dirixida ao persoal político e técnico das administracións locais, así como ao tecido asociativo, co obxectivo de mellorar a planificación e coordinación da axuda humanitaria en situacións de emerxencia.
A concelleira de Dereitos e Servizos Sociais, Promoción Económica e Xuventude, María Rozas, foi a encargada de inaugurar a xornada. Durante a súa intervención, subliñou “o papel relevante que debemos ter as administracións locais en materia de axuda humanitaria e cooperación internacional, un convencemento co que traballamos desde o Concello de Santiago”. A tenenta de alcaldesa agradeceu tamén o labor do Fondo Galego e das persoas participantes, e destacou a necesidade de actuar “con coñecementos, certa preparación e moita coordinación” para garantir unha acción solidaria eficaz e respectuosa coa dignidade das persoas afectadas.
O curso abordou casos reais de resposta a crises, como a DANA de Valencia de 2024 ou situacións derivadas de conflitos internacionais, incidindo na importancia de axustar a axuda ás necesidades reais da poboación e evitar erros de xestión que agraven as emerxencias. A proposta forma parte da aposta municipal por fortalecer as capacidades institucionais e promover unha cooperación informada e ética.
Neste contexto, María Rozas anunciou que o Concello destinará 400.000 euros á nova convocatoria de subvencións de cooperación ao desenvolvemento, mantendo así o orzamento “máis alto desde a creación desta liña de axudas” e un 138% superior ao de 2022. As axudas están dirixidas a Organizacións Non Gobernamentais de Desenvolvemento (ONGD) que realicen proxectos en países empobrecidos, con un máximo de 40.000 euros por proxecto e un prazo de execución de 12 meses.
As bases da convocatoria, aprobadas recentemente pola Xunta de Goberno, foron elaboradas en colaboración coa Coordinadora Galega de ONGD e incorporan novidades derivadas do Real Decreto 188/2025, como un novo sistema de xustificación simplificado, que exime ás entidades de presentar facturas ou xustificantes de gasto coa documentación final.
Na convocatoria anterior subvencionáronse 14 proxectos de cooperación, catro deles en África —en Guinea, Congo e Mozambique— e o resto en América Latina, con actuacións en Guatemala, Bolivia, El Salvador, República Dominicana, Cuba e Nicaragua. A maioría das iniciativas estiveron centradas no acceso á auga potable e o fortalecemento da soberanía alimentaria, ámbitos que o Concello compostelán considera prioritarios na súa política de cooperación.
