A Asociación de Nais e Pais do Alumnado (ANPA) Camiño de Santiago do CEIP Monte dos Postes, en Santiago de Compostela, presentou unha reclamación formal ante a Consellería de Educación, Ciencia, Universidades e Formación Profesional pola falta de profesorado e de persoal de apoio no centro. Ademais, solicitou unha reunión coa Inspección Educativa para abordar a situación, que cualifican de “crítica”, especialmente no ámbito da atención á diversidade.

Segundo a reclamación, o colexio conta neste curso 2025–2026 con 1,5 docentes de Pedagoxía Terapéutica (PT) —que deben repartirse tamén co CEIP das Fontiñas— e un único especialista de Audición e Linguaxe (AL). Pola contra, o centro escolariza 21 alumnos e alumnas con discapacidade igual ou superior ao 33%, e un total duns 50 estudantes con necesidades específicas de apoio educativo (NEAE).

A ANPA denuncia que esta escaseza de profesorado especializado reduce as horas de apoio nas aulas ordinarias, o que “repercute negativamente na inclusión e na aprendizaxe de todo o alumnado”. Tamén advirten dunha sobrecarga de traballo no profesorado, que dificulta ofrecer unha atención individualizada e de calidade.

En relación ao persoal de coidado, as familias indican que unha soa coidadora non pode atender correctamente a varios menores de diferentes idades e etapas educativas, polo que reclaman unha revisión dos criterios de dotación. “Coa dotación actual non se garante unha atención axeitada nin se respectan os dereitos do alumnado a unha educación inclusiva e equitativa”, sinalan, citando a Lei Orgánica 3/2020 (LOMLOE) e a Convención sobre os Dereitos das Persoas con Discapacidade.

A presidenta da ANPA, Marta Abal Rodríguez, subliña que non se trata dunha petición excepcional: “Non pedimos nada extraordinario, só os recursos mínimos necesarios para garantir unha educación pública, inclusiva e igualitaria”. A asociación pide un aumento urxente de profesorado de apoio (PT e AL) e de persoal de coidado, así como o reforzo de recursos materiais e humanos.

As familias agardan unha resposta inmediata por parte da Consellería e advirten de que, se non chegan medidas concretas, iniciarán mobilizacións no centro ata que se doten os recursos necesarios.