Un grupo de veciños da Praza de Cervantes, no casco histórico compostelán, iniciou unha recollida de sinaturas a través das redes sociais para solicitar ás administracións que actúen ante a presenza dun home sen fogar que vive de forma permanente na zona.
Segundo o texto difundido, o individuo permanece completamente espido, tapado unicamente cunha manta, realiza as súas necesidades na vía pública, nas portas dos locais da zona ou dentro da fonte da praza e xera problemas de insalubridade e tensión veciñal. A iniciativa suma xa máis de 120 apoios en liña.
Fontes municipais lembran que os servizos sociais xa interviñeron no caso, ofrecéndolle alternativas de acollida, pero o home rexeitou recibir asistencia. A concelleira de Servizos Sociais, María Rozas, indicara días atrás que se trataba dun caso complexo, no que se tenta actuar “dende a atención e o acompañamento, non desde o castigo”.
A ALCALDESA PIDE “RESPONSABILIDADE”
A alcaldesa da cidade, Goretti Sanmartín, afirmou que o Concello xa interveu dende o primeiro momento e que a única opción agora é a vía xudicial, tras varios intentos de realoxo e atención sanitaria sen éxito.
Reclamou “respecto pola protección de datos” e pediu “responsabilidade mentres se agarda pola resolución xudicial” dun caso que, recoñeceu, “leva demasiado tempo prolongándose” e que comprende o malestar que está a xerar. “O Partido Popular puxo no foco con nomes e apelidos a unha persoa. Iso non pode facerse”.
