O Concello de Santiago celebrou hoxe un acto de recepción oficial a Sandra Garrido e Manu López, activistas galegos que participaron na última misión da Flotilla a Gaza e que foron detidos polo exército israelí antes de seren liberados. O encontro, presidido pola alcaldesa Goretti Sanmartín, contou coa presenza de representantes de todos os grupos municipais, agás do PP, e converteuse nunha mostra pública de apoio á causa palestina.
Sanmartín abriu o acto lembrando a recente “manifestación histórica” celebrada na Praza do Obradoiro, que, segundo dixo, “encheu Compostela de dignidade e de voces que reclaman o fin do xenocidio”. A rexedora subliñou que “non pode haber equidistancia cando están asasinando un pobo enteiro” e chamou a “parar os pés ao Estado xenocida de Israel” e á connivencia internacional que, ao seu xuízo, permite que se vulneren “as leis internacionais en augas abertas sen consecuencias”.
A alcaldesa afirmou que Sandra Garrido e Manu López representan “a voz da dignidade e o berro de denuncia dun pobo que non quere seguir mirando cara outro lado mentres se asasinan crianzas e civís en Palestina”. Ademais, anunciou que o Concello continuará amosando o seu compromiso coa causa, lembrando que a bandeira palestina segue pendurada do balcón da Casa do Concello “como símbolo de solidariedade permanente”.
Durante a súa intervención, Sandra Garrido agradeceu o respaldo institucional e veciñal recibido en Compostela e advertiu que “Palestina soa non vai saír desta situación; é precisa a presión internacional e a mobilización social”. A activista denunciou que a compañeira Reyes Rigo segue presa en Israel, “acusada falsamente”, e reclamou ao Goberno español que actúe para defender ás persoas detidas con pasaporte español. “Hai máis de once mil palestinos encarcerados en condicións indescritibles; se non se para desde fóra, non se vai parar”, insistiu.
Pola súa banda, Manu López destacou o carácter colectivo da misión e asegurou que “foi unha honra representar o sentir dun pobo” que non permanece alleo ao sufrimento palestino. Lembrou o momento en que, desde o barco Meteque, viron achegarse as embarcacións militares israelís: “Alí dixemos que isto non era o final, senón o principio”.
