A Facultade de Ciencias Políticas e Sociais da Universidade de Santiago de Compostela acollerá o vindeiro martes, 7 de outubro, ás 18:00 unha xornada titulada ‘Xenocidio en Gaza. Testemuñas e Debates’. A actividade conta coa colaboración da Fundación Araguaney-Puente de Culturas, a través da Cátedra USC – Araguaney para o Diálogo entre Culturas.
O acto será presentado pola decana do centro, Marta Lois, e incluirá as intervencións de Marryvell Abu Nada, alumna palestina de primeiro curso de Ciencias Políticas, e da profesora de Relacións Internacionais Carmen Montero Ferrer, quen achegarán análises e experiencias arredor da situación en Palestina.
No marco da xornada proxectarase o documental No Other Land (2024), dirixido por un equipo de cineastas palestinos e israelís, que acadou o Óscar á Mellor Longametraxe Documental en 2025. A película foi estreada na Berlinale de 2024, onde obtivo varios premios, e afonda na resistencia da comunidade palestina de Masafer Yatta fronte ás expulsións e demoliciones impulsadas polas autoridades israelís.
A obra segue a historia de Basel Adra, activista palestino que documenta a destrución progresiva das aldeas da súa rexión natal, e a súa relación co xornalista israelí Yuval Abraham, nunha reflexión sobre a loita pola xustiza e a esperanza no medio dun conflito histórico.
