O Concello de Santiago de Compostela celebrou este mércores un acto no que membros da Corporación e persoal municipal gardaron un minuto de silencio en memoria dunha muller asasinada por violencia machista.
Con este xesto, deuse cumprimento á moción aprobada por unanimidade no Pleno do 7 de setembro de 2015, que establece a realización de accións de dó e solidariedade por cada novo feminicidio.
Desde o goberno local e o conxunto da Corporación subliñouse que a violencia de xénero representa a forma máis extrema da desigualdade estrutural que sofren as mulleres, e que estes crimes responden ao uso da violencia como mecanismo de control e dominación.
O executivo municipal expresou a súa condena firme contra a violencia machista e trasladou a súa solidariedade ás familias das vítimas, reiterando o compromiso de Santiago na loita contra esta lacra social.
