A mobilización sindical volverá ás rúas de Santiago mañá, venres 26 de setembro, nunha concentración convocada por CCOO, UGT e CIG na Paraza do Toural entre as 11:00 e as 12:00. Nela, traballadoras e traballadores do sector da hostalaría manifestaranse polo bloqueo da negociación do convenio provincial, que regula as condicións laborais de arredor de 20 000 persoas.
As organizacións sindicais acusan á patronal de non querer introducir melloras e mesmo de pretender recortar dereitos consolidados, como o complemento por incapacidade temporal. Segundo denuncian, mentres o sector bate récords de turismo e facturación, os salarios continúan próximos ao SMI e as condicións laborais apenas experimentan avances.
“Esiximos unha negociación real con perspectiva social, a actualización dos salarios e, en definitiva, un convenio xusto e digno”, reclaman dende CCOO, postura compartida polos outros sindicatos convocantes.
A protesta de mañá dá continuidade a outras accións, como a concentración recente na Coruña coincidindo co Burger Fest, ou a recollida masiva de sinaturas realizada nesa cidade e en Santiago. Para a parte social, estas mobilizacións evidencian “o amplo apoio dos cadros de persoal ás reivindicacións”.
A hostalaría é un dos principais motores económicos de Galicia, con máis de 73 000 persoas afiliadas á Seguridade Social en agosto de 2025 e un crecemento anual do 2,2 %. Só no primeiro semestre do ano, os ingresos do sector hoteleiro galego alcanzaron os 165,5 millóns de euros, un 4,3 % máis que no mesmo período de 2024. Con todo, este dinamismo económico non se reflicte nas condicións laborais: o sector acumula sobrecargas de traballo, horarios partidos e riscos psicosociais crecente, cun nivel salarial que apenas supera o mínimo legal.
Dende CCOO tamén subliñan o “contraste” co convenio asinado recentemente en Pontevedra, que contempla unha suba salarial do 7 % para 2024-2025, cláusula de revisión ligada ao IPC real e melloras sociais, como o ascenso de categoría das camareiras de piso en hoteis de 3 a 5 estrelas a partir de 2027.
