Unha veciña de San Martiño de Laraño, no lugar da Barcia, vén de trasladar publicamente a Xornal de Compostela a súa preocupación pola falta dun espello viario na saída da súa vivenda, situada xusto despois dunha curva da estrada AC-543, ao carón da Papelera de Brandía.
Segundo explica a este medio Sefa Uzal Vieites, residente na zona, leva dende o pasado ano solicitando por escrito tanto ao Concello de Santiago como á Axencia Galega de Infraestruturas (AXI) a colocación deste elemento de seguridade. “A Xunta contestoume dicindo que o Concello podía solicitarlles o permiso para instalalo, pero nin un nin outro fixeron nada”, sinala.
A veciña asegura que a saída da súa propiedade resulta perigosa debido á escasa visibilidade e á velocidade coa que circulan os vehículos. “Temos que saír a oídas e pegando un acelerón porque é a única entrada e saída que temos. No inverno aínda nos guiamos polas luces dos coches, pero agora non”, relata.
A situación agrávase, segundo indica, pola presenza da súa nai, enferma de Alzhéimer, que a obriga a realizar desprazamentos frecuentes. “Teño máis medo cada vez que saio coa miña nai”, engade.
Uzal lembra que na contorna xa se produciron varios accidentes e advirte de que teme que só se actúe “cando me leven por diante”. Por iso pide que se coloque canto antes o espello “por seguridade viaria”.
A veciña asegura que seguirá reclamando ata obter unha solución definitiva, ao entender que o problema responde a un baleiro competencial entre Concello e Xunta que mantén a zona sen a medida de protección reclamada.
RESPOSTA DA XUNTA DE GALICIA
A este respecto, a Xunta de Galicia respondeu á veciña indicando que a súa solicitude foi recibida e que, segundo a normativa vixente —Lei 8/2013 de estradas de Galicia e a norma estatal 8.1-IC de sinalización vertical—, a instalación de espellos non está contemplada como medida de seguridade viaria nin como parte dos elementos de balizamento das estradas.
Por iso, a administración autonómica sinala que non lle corresponde acometer esa actuación. Non obstante, lembra que o Concello de Santiago pode solicitar autorización para colocar o espello, ao abeiro do artigo 43.f) da Lei de estradas, a través do procedemento administrativo IF204A na sede electrónica da Xunta.
