O Movemento Global a Gaza – Galiza convocou para o vindeiro 30 de agosto unha concentración en Santiago de Compostela, que terá lugar ás 12:00 na Praza do Toural, co obxectivo de denunciar a situación que vive a poboación palestina e apoiar a saída da Flotilla Sumud Global, prevista para o 31 de agosto desde diferentes portos internacionais.
A mobilización insírese nunha xornada de accións simultáneas en diversas cidades e vilas galegas. Desde a organización convocante denuncian que a comunidade internacional está a presenciar “en directo un xenocidio”, no que resultan afectadas de maneira directa familias enteiras, hospitais, escolas, persoal sanitario e xornalistas. Critican tamén a “complicidade de gobernos europeos e institucións internacionais, que manteñen relacións comerciais e militares co Estado de Israel mentres a infancia palestina é obxectivo do terror”.
A Flotilla Sumud Global estará formada por ducias de embarcacións con tripulacións procedentes de 44 países. O seu propósito é romper o bloqueo marítimo imposto a Gaza e entregar axuda humanitaria, ao tempo que se visibiliza o apoio internacionalista á causa palestina.
“O 30 de agosto, Galiza sairá á rúa para dicir que Palestina non está soa”, sinalan desde o Movemento Global a Gaza – Galiza, que chama á participación cidadá e das organizacións sociais, sindicais, culturais e políticas compostelás. A plataforma pide tamén manter a atención durante a viaxe da flotilla, ante a posibilidade de sabotaxes ou ataques.
