A praza do Obradoiro acolleu este luns un acto de homenaxe a Ánxel Casal, alcalde de Santiago en 1936 e figura clave do galeguismo, no que a rexedora compostelá Goretti Sanmartín fixo unha chamada a manter vivo o legado da memoria histórica. “Estamos aquí para escoitar esa voz que non calou, aínda que tentasen erradicala”, afirmou, engadindo que “esquecer é traizoar a quen nos fixo ser quen somos”.
Sanmartín subliñou que construír a cidade soñada por Casal non debe limitarse a un recordo simbólico, senón a “facer unha Compostela aberta, culta, galega, con servizos dignos e orgullosa de ser capital de Galiza”. A alcaldesa destacou tamén a importancia de iniciativas recentes como a recuperación das esculturas románicas do Mestre Mateo ou a creación das marcas Compostela é Memoria e As mil Marías, proxectos municipais que pretenden visibilizar o papel das mulleres represaliadas e dar continuidade ao traballo de lembranza.
No acto interviñeron tamén Xoán Xesús Carril, alcalde de Arzúa, e Lucía Calvo de la Uz, alcaldesa de Teo, xunto co reitor da USC, Antonio López, e representantes da corporación municipal compostelá. A música correu a cargo do grupo Carapaus, nun evento que reuniu a diversas asociacións e colectivos vencellados á memoria histórica.
Tras a celebración en Santiago, a alcaldesa desprazouse a Teo, onde participou na ofrenda floral organizada no monólito da Estivada da Ribeira, lugar no que foi atopado o corpo de Casal en agosto de 1936, tras ser asasinado.
A figura de Casal, alén do seu papel como rexedor de Santiago, abrangue tamén a súa condición de vicepresidente da Deputación da Coruña, membro do Partido Galeguista e das Irmandades da Fala, así como impulsor do Estatuto de 1936. A súa traxectoria política estivo sempre ligada á actividade cultural e editorial, xunto coa súa muller María Miramontes, co obxectivo de avanzar na normalización do galego e fortalecer a identidade colectiva do país.
