Preto dun centenar de persoas vinculadas a familias con membros con discapacidade intelectual reuníronse este sábado no Hotel ‘Los Abetos’ de Santiago de Compostela no marco do Encontro de Familias organizado por FADEMGA Plena inclusión Galicia. A xornada, baixo o lema “Un camiño compartido”, tivo como obxectivo principal reforzar a unión familiar, poñer voz ás persoas con discapacidade e reclamar avances nas políticas públicas de atención e inclusión.
O acto de apertura contou coa presenza de representantes da Xunta de Galicia, do Parlamento galego e das entidades sociais, que coincidiron en sinalar o valor do traballo colectivo das familias e das organizacións do terceiro sector. O presidente de FADEMGA, Eladio Fernández, abriu a xornada cunha mensaxe clara: “Esta xornada non é só un espazo de encontro, é un acto de forza social”, dixo, lembrando que FADEMGA xestiona “máis de 7.000 prazas públicas” e advertindo da incerteza que pesa sobre o seu futuro: “Non podemos seguir vivindo baixo a espada de Damocles”.
Na súa intervención, Fernández fixo un chamado directo á Administración para recoñecer e escoitar o traballo do movemento asociativo, destacando o seu papel como axente esencial no sistema público de coidados e atención á discapacidade. “Queremos —e debemos— esixir que a Administración nos dea resposta”, afirmou.
Entre as representantes políticas presentes estivo Patricia Iglesias, deputada do PSdeG-PSOE, quen insistiu na necesidade de reforzar o modelo centrado na persoa e apostar pola educación e o emprego inclusivos. Iglesias defendeu tamén a figura do concerto social como ferramenta para garantir servizos públicos de calidade ofrecidos polas entidades do terceiro sector. Pola súa banda, a deputada do BNG Ariadna Fernández mostrou o seu apoio á labor de FADEMGA e fixo un chamamento a “políticas e actitudes de cambio”.
En representación do Goberno galego, Begoña Abeijón, directora xeral de Discapacidade da Xunta, recoñeceu “a valentía das familias” e expresou o compromiso da Administración coas liñas de traballo prioritarias no eido da discapacidade: atención temperá, accesibilidade, educación inclusiva e acceso ao emprego público. “Seguiremos apostando porque as persoas con discapacidade intelectual poidan vivir a vida que elixan vivir”, asegurou.
O programa da xornada estruturouse en torno a dúas mesas principais. Na primeira, titulada “Voces que importan”, tomaron a palabra persoas con discapacidade intelectual, como os autoxestores Jesús Cabo e Alberto Seoane, xunto coa experta en ética e conduta Carmen Márquez, para reflexionar sobre dereitos, autonomía e participación social. A segunda sesión, “Acompañando ás familias”, contou coa intervención de Laura Fernández e Isabel Fragueira, da entidade Redeiras Solidarias, centrada nos apoios emocionais que precisan as familias ao longo do ciclo vital.
Con esta xornada, FADEMGA consolida o seu Encontro de Familias como un espazo clave de reivindicación, apoio mutuo e planificación de futuro, no que as voces das persoas con discapacidade e das súas familias buscan seguir tendo presenza activa no deseño das políticas públicas en Galicia.
