Un grupo de mulleres de Compostela convocou unha mobilización para este xoves 26 de xuño co obxectivo de denunciar o xenocidio do pobo palestino, centrando a súa mensaxe na situación que sofren especialmente as mulleres e as crianzas nos territorios ocupados. A acción comezará ás 19:30 na Praza do Toural, desde onde partirá unha marcha cara á Praza de Galicia. Alí desenvolverase unha cacerolada como acto final de protesta.
Segundo explica Concha de la Fuente, unha das promotoras da iniciativa, a mobilización nace da urxencia de non calar fronte ao que cualifica como unha exterminación sistemática dun pobo. “As mulleres non podemos ficar impasíbeis diante deste horror”, asegura, destacando que os datos indican que o 70% das vítimas son mulleres e nenas. Por iso, fan un chamado específico ás mulleres da cidade para que participen activamente nesta denuncia pública.
A acción contará cun compoñente performativo, xa que se solicita ás asistentes que acudan vestidas de negro, cunha kufiya palestina e cargando un fardo con manchas vermellas, en referencia ás vítimas da violencia armada. O obxectivo é transmitir visualmente a dor e a inxustiza que se está a vivir na franxa de Gaza e en Cisxordania, segundo sinalan desde a organización.
A convocatoria pretende visibilizar non só os bombardeos e a destrución sistemática da poboación civil palestina, senón tamén as consecuencias que estas accións teñen sobre as condicións de vida da poboación máis vulnerable. As organizadoras denuncian que as crianzas palestinas están a sufrir fame, enfermidade e morte nun contexto de desabastecemento e falta de atención humanitaria.
Desde a organización insisten en que esta mobilización é tamén unha expresión de solidariedade internacional e de recoñecemento ao sufrimento das mulleres gazatís. “Queremos que se vexa e se sinta o horror que viven as mulleres e as crianzas na franxa de Gaza”, subliñan, cun chamado a participar e a romper o silencio fronte á violencia e a inacción política internacional.
A protesta únese así a outras convocatorias similares celebradas noutras cidades e pretende converter o centro de Santiago nun espazo de memoria, denuncia e solidariedade activa co pobo palestino.
