Baixo o lema ‘Pasiño a pasiño… acadando metas’, a Asociación ASPAS completou con éxito o seu Camiño de Santiago pola ruta inglesa, entre Ferrol e Compostela. A entidade, formada por familias de persoas con discapacidade intelectual, promoveu esta actividade como un espazo de convivencia, superación e visibilización das capacidades do colectivo, nun itinerario que percorreu os 113 quilómetros desta ruta xacobea ao longo das fins de semana de abril e maio.
Durante sete etapas, unha media de 65 persoas por xornada, con e sen discapacidade, participaron nesta camiñada. A derradeira etapa, celebrada o venres 31 de maio, reuniu a 158 camiñantes, que partiron desde A Sionlla ás 10:00 da mañá e foron sumándose ao longo do traxecto ata chegar á Praza do Obradoiro, onde foron recibidos por familiares e amizades nun ambiente cargado de emoción.
A organización proporcionou camisetas conmemorativas, avituallamento, vehículos de apoio e autobuses dende Santiago, para garantir que todas as persoas puidesen completar cada etapa nas mellores condicións posibles. O xantar de confraternización final, na Carballeira de San Lourenzo, reuniu a máis de 150 persoas, pechando cun ambiente festivo unha iniciativa que tivo como eixo central a inclusión.
Segundo fontes da asociación, esta actividade supón un dos momentos máis importantes do calendario anual de ASPAS, pero non será o último. O vindeiro 20 de setembro, a entidade organizará en Narón a representación do musical inclusivo ‘Peter Voamos!!’, que contará con 50 actores con discapacidade intelectual e máis de 30 músicos e bailarinas novas da contorna compostelá. Con este novo proxecto, ASPAS reafirma o seu compromiso coa inclusión a través de iniciativas culturais que dan visibilidade e protagonismo ás persoas con discapacidade.
