Movemento Sumar Galicia vén de instar ao presidente da Xunta, Alfonso Rueda, a garantir o mantemento do Máster Universitario en Matemáticas da USC. A organización alerta de que a posible desaparición deste título suporía un golpe directo á ciencia e á investigación en Galicia.
Segundo explicou a secretaria comarcal de Sumar en Compostela, Luisa Pasín, o mestrado representa un piar esencial do ecosistema académico e científico galego, polo seu papel na formación avanzada e na xeración de coñecemento. “A matemática é unha ferramenta básica para a ciencia, para a tecnoloxía, para o mundo empresarial”, afirmou, advertindo de que a súa eliminación empobrecería os programas de doutoramento e reduciría a capacidade da USC para atraer talento e proxectos de investigación.
Dende Sumar Galicia critícase que a Xunta estea a aplicar criterios cuantitativos de curto prazo, como a ratio de alumnado, sen ter en conta a importancia estratéxica da formación matemática. “É unha decisión política: declarar a singularidade para que non se aplique a ratio”, sosteñen, en referencia á posibilidade de excepcionar determinados títulos por razóns de interese científico ou social.
A formación asegura que a Xunta está a favorecer o avance da educación privada en detrimento da universidade pública. “Non imos ser cómplices do desmantelamento da USC para favorecer os novos chiringuitos privados que están a impulsar PP e PSOE”, declarou Pasín, quen pediu un compromiso firme por parte do goberno galego para asegurar a continuidade do máster.
Sumar Galicia remarca que este programa é unha peza clave para o futuro científico do país e considera que existen sobrados motivos para declarar a súa singularidade e garantir o seu funcionamento máis aló dos criterios estritamente numéricos.
