A folga do servizo de recollida de lixo e limpeza viaria de Santiago de Compostela quedou desconvocada logo de que empresa concesionaria e persoal chegaran a un acordo durante a noite pasada. Así o confirmou este venres o concelleiro de Servizos Básicos, Xesús Domínguez, que cualificou a nova de ‘moi boa para toda a veciñanza’.
Dende o goberno local salientan que o Concello seguirá vixiando o cumprimento do contrato por parte da concesionaria, co obxectivo de garantir un bo servizo tanto na recollida como na limpeza das rúas. O executivo municipal incide en que manterá a súa implicación para que a prestación se desenvolva con normalidade e segundo os estándares de calidade que esixe a cidade.
Ao tempo, Domínguez fixo un chamamento á cidadanía para colaborar na correcta separación dos residuos, lembrando que este é un aspecto clave para cumprir cos obxectivos marcados pola Unión Europea en materia de reciclaxe e sustentabilidade. Tamén aproveitou para lembrar que é necesario avisar previamente para a recollida de voluminosos, a fin de garantir un servizo eficiente e respectuoso co espazo público.
A folga, que ameazaba con paralizar a recollida do lixo en plena semana das festas da Ascensión e nesta fin de semana do Banquete de Conxo, queda así neutralizada tras un acordo que, segundo fontes sindicais, incluiría melloras nas condicións laborais dos traballadores.
O presidente do comité de empresa, Ricardo Méndez, explicou que o acordo é “medianamente satisfactorio” para ambas as partes.
Deste xeito, terán un novo convenio de dous anos, fronte ao catro que propuña a empresa e no que se recollerá un incremento salarial do 2,25% cada ano. Cabe lembrar que os traballadores pedían unha subida salarial do 5% a dous anos e a proposta inicial da empresa era un aumento a catro anos do 0,75% por ano.
No que se refire á conciliación, alcanzaron un acordo polo que os traballadores terán seis días máis de asuntos propios ao ano, polo que pasarán de tres a nove. Ademais, conseguiron manter o complemento por Incapacidade Temporal e a mellora do sistema de contratación.
