Traballadoras de residencias privadas de maiores e do Servizo de Axuda no Fogar (SAF) percorreron este sábado as rúas de Santiago para esixir un convenio colectivo que “dignifique as súas condicións laborais” e garanta unha atención de calidade ás persoas dependentes. A protesta, convocada pola CIG-Servizos, reuniu persoal de toda Galicia, que denunciou precariedade, baixos salarios e a “falta de compromiso” da patronal e da Xunta, coincidindo co recente anuncio dun plan para a construción de 24 novas residencias.
Durante a mobilización, o secretario de Negociación Colectiva da CIG-Servizos, Adolfo Naya, criticou que o 60 % das traballadoras de residencias perciban salarios inferiores ao SMI, acusando á Xunta de “lavarse as mans” fronte ás condicións laborais do sector. Ademais, anunciou novas xornadas de folga para maio e advertiu dunha posible denuncia contra empresas que vulneraron o dereito á folga impoñendo servizos mínimos abusivos.
Beatriz Fernández, traballadora da residencia Domus de Ferrol, cualificou as condicións laborais de “nefastas e frustrantes”, denunciando a falta de persoal, a sobrecarga de traballo e a incapacidade de ofrecer unha atención digna ás persoas residentes. As traballadoras reclaman melloras salariais, redución da carga laboral, máis persoal e medidas de conciliación da vida laboral e persoal.
A manifestación concluíu en Praterías coa lectura de tres manifestos nos que as traballadoras das residencias, do SAF e o colectivo de xubilados da CIG reclamaron un sistema público galego de atención ás persoas, criticaron a paralización dos convenios colectivos e denunciaron a precarización dun sector esencial que, afirman, só se mantén grazas ao esforzo e compromiso dos seus traballadores e traballadoras.
