O sector das residencias privadas de Galicia vive este sábado 26 de abril a segunda das catro xornadas de folga convocadas pola CIG-Servizos, coa participación de traballadoras que reclaman un ‘convenio digno e salarios xustos’. A protesta terá un dos seus momentos centrais en Santiago de Compostela, onde está convocada unha manifestación con saída ás 11.00 horas desde a Alameda.
A mobilización en Compostela forma parte dun calendario de protestas en varias localidades galegas, como A Coruña, Ferrol, Vilagarcía, Carballo, Pontevedra e Vigo, impulsadas pola central sindical. A CIG asegura que o seguimento da folga está a facerse notar tamén a través de concentracións espontáneas diante dos centros de traballo, especialmente durante os descansos e os cambios de quenda.
As traballadoras denuncian condicións laborais precarias, entre elas a sobrecarga de tarefas, a realización de funcións alleas ao seu posto, a escaseza de tempo para a atención ás persoas usuarias e uns salarios baixos, aos que suman cocientes de persoal que consideran “obsoletos”. Segundo explica o sindicato, esta situación afecta de forma directa á calidade asistencial e ao benestar das propias empregadas.
O secretario de Negociación Colectiva da CIG-Servizos, Adolfo Naya, advertiu de que o sindicato está a avaliar posibles denuncias contra empresas do sector que comunicaron os servizos mínimos con posterioridade ao inicio da folga, feito que considera unha vulneración do dereito constitucional á folga: ‘Non o imos consentir’, asegurou.
As mobilizacións continuarán os días 7 e 21 de maio, e, segundo informou o sindicato, de non producirse avances na negociación dun novo convenio colectivo, estudarase a posibilidade de incrementar a intensidade das protestas nas semanas seguintes.
A CIG chama á sociedade a apoiar as súas reivindicacións, co obxectivo de garantir unha mellora das condicións laborais nun sector esencial para os coidados e a atención ás persoas maiores en Galicia.
