A Asociación de Pacientes e Usuarios do CHUS vén de trasladar a súa preocupación pola decisión da dirección do hospital de reubicar a doentes de Hematoloxía, con tratamentos activos de quimioterapia, na planta de Xinecoloxía, sen dotar previamente ao persoal de formación específica para este tipo de atención.
Segundo denuncian, a medida adoptouse no mes de febreiro e supuxo a incorporación de seis camas adicionais destinadas a pacientes de Hematoloxía, que se sumaron ás xa existentes de Xinecoloxía, sen reforzo de persoal. Este cambio obrigou ás enfermeiras da unidade a atender ata 12 pacientes por quenda, con ratios de catro pacientes por profesional, incluíndo casos con tratamentos complexos como a denominada quimio vermella, que require protocolos estritos de seguridade.
A situación foi trasladada polas propias traballadoras ao equipo directivo do centro hospitalario mediante queixas reiteradas, mais, segundo aseguran, non foron escoitadas ata este mes de abril, cando finalmente foron convocadas a unha reunión. A día de hoxe, segundo a denuncia feita pública, o persoal conta só con algunhas horas de formación e segue sen dispoñer de material adecuado e suficiente para garantir a seguridade dos tratamentos.
Os pacientes afectados sinalan que esta situación “pode supoñer un risco para a saúde”, ao seren atendidos por profesionais sen coñecementos específicos sobre os tratamentos oncohematolóxicos. Subliñan que os erros na administración de certos fármacos poden ter consecuencias graves, tanto para os doentes como para os propios sanitarios, dado o nivel de toxicidade dalgúns compostos utilizados.
Desde o colectivo denunciante acúsase á xerencia do hospital de actuar con “improvisación” e “desprezo” cara ao persoal e aos pacientes, priorizando criterios económicos por riba da calidade asistencial. Advirten tamén que esta reordenación vulnera as recomendacións do Ministerio de Sanidade para as unidades de hospitalización de día oncohematolóxicas, nas que se especifica a necesidade dun programa de formación continuada adaptado aos coidados oncohematolóxicos.
A situación xerou unha importante inquietude entre a cidadanía usuaria do hospital, que reclama a revisión inmediata da medida, a dotación dos recursos formativos e materiais necesarios, e que se garanta que os coidados se leven a cabo con plenas garantías clínicas e de seguridade.
Os colectivos implicados reiteran a súa disposición a colaborar co centro hospitalario pero esixen responsabilidades e solucións urxentes, para evitar que se repitan situacións que poidan comprometer a saúde dos pacientes.
