Esta mañá o colectivo ‘9 detencións, 0 explicacións’ celebrou unha rolda de prensa no Centro Social A Gentalha do Pichel para denunciar as detencións ocorridas en Santiago de Compostela o pasado 6 de outubro, tras unha manifestación en apoio ao pobo palestino. O acto contou coa presenza duns corenta asistentes, entre os que se incluían persoas detidas e representantes de organizacións solidarias.
O colectivo presentou un comunicado no que expuxeron a súa versión dos feitos e cuestionaron a actuación das forzas de seguridade do Estado, ás que acusan de “empregar violencia policial” contra manifestantes que participaban nunha acción de boicote contra unha cadea de comida rápida.
AS DETENCIÓNS TRALA PROTESTA DO 6 DE OUTUBRO
Segundo explicaron, a manifestación do 6 de outubro, convocada en apoio ao pobo palestino, rematou cunha acción de boicote organizada por BDS Galiza e a Rede Galega pola Palestina, da que deu conta tamén no seu momento Xornal de Compostela, fronte ao establecemento Burger King da rúa da Senra. O obxectivo da protesta era denunciar a suposta complicidade da empresa co conflito en Palestina.
A intervención policial chegou cando un grupo de manifestantes bloqueou a entrada do establecemento. A carga dos axentes saldouse con cinco detencións e a dispersión do grupo. Posteriormente, ao longo do día, outras catro persoas foron arrestadas durante unha concentración espontánea que reclamaba a súa liberación.
Ver esta publicación en Instagram
O colectivo denuncia que estas actuacións foron inxustificadas e que as persoas detidas seguen sen recibir unha explicación clara sobre os motivos das súas imputacións. De aí o lema da campaña: “9 detencións, 0 explicacións”.
CONVOCATORIA DE CONCENTRACIÓN ANTE OS XULGADOS
Na rolda de prensa, os portavoces da plataforma denunciaron que as detencións forman parte dun intento de criminalización dos movementos sociais e fixeron un chamamento á mobilización para defender a liberdade de expresión e o dereito á protesta pacífica.
Como resposta, convocaron unha concentración o mércores 19 de febreiro ás 11:00 horas diante dos xulgados de Fontiñas, coincidindo coa declaración xudicial das cinco persoas detidas na primeira intervención policial.
O colectivo reclama a absolución de todas as encausadas e pide á cidadanía que participe na mobilización para visibilizar o que consideran un ataque á liberdade de expresión e á loita solidaria internacionalista.
