O profesorado axudante doutor da Universidade de Santiago de Compostela levou a cabo esta mañá unha concentración ás 12.00 horas diante da Reitoría. O obxectivo da protesta é reclamar que non se paralice o seu proceso de estabilización, algo que consideran esencial para mellorar as súas condicións laborais e avanzar na súa carreira docente. Segundo a plataforma convocante, encabezada polo voceiro Adrián Dios, o colectivo denuncia ser o máis precario dentro da institución universitaria.
UN COLECTIVO “SOBRECUALIFICADO” CON CONTRATOS TEMPORAIS
O colectivo, que agrupa unhas 180 persoas, afirma que os seus membros están contratados de forma temporal e cunha retribución inferior á doutras figuras docentes na universidade. A figura de axudante doutor é, segundo explican, a porta de entrada máis habitual á carreira docente, pero tamén alertan de que a falta dunha política de persoal adecuada nas últimas décadas levou a que este profesorado estea “sobrecualificado” para as prazas que ocupa.
De feito, segundo a plataforma, o 71,8% do profesorado axudante doutor da USC posúe xa a acreditación necesariapara ascender na súa categoría laboral, un requisito indispensable segundo a lexislación. A pesar diso, critican que os procesos de estabilización son lentos, dificultando a súa promoción.
Adrián Dios advirte que, malia que nos últimos anos a USC permitiu que o profesorado optase á estabilización antes de esgotar os seus contratos temporais, temen que esta dinámica non continúe. “O obxectivo debe ser acelerar o proceso, pero o que vemos é que está paralizado e que se pode estancar”, afirma o voceiro.
Engade que esta estabilización é especialmente importante no contexto actual da USC, onde se está a producir un masivo proceso de xubilacións. “Se hai xubilacións, ten que haber unha renovación tamén masiva”, insiste.
Pola súa parte, o vicerreitor de profesorado, Ernesto González Seoane, manifestou a súa sorpresa pola convocatoria da protesta. “Están protestando contra unha proposta que aínda non está elaborada”, declarou en conversacións con medios. González Seoane asegurou que o equipo de goberno está traballando na planificación do persoal docente e investigador (PDI) para 2025 e defendeu as condicións laborais ofrecidas pola USC.
O vicerreitor destacou que a institución compostelá é “unha das mellores universidades de España” en termos de condicións para o profesorado axudante doutor. Engadiu que, en moitas universidades, é necesario esgotar os contratos temporais antes de optar á estabilización, mentres que en Santiago esta pode acadarse “mesmo no primeiro ano”. Segundo González Seoane, no 2024 79 profesionais lograron estabilizarse, e comprometeuse a continuar nesta liña.
A plataforma organizadora da protesta recoñece que a USC lles trasladou “boa vontade”, pero considera que as limitacións orzamentarias están a frear o proceso. Dios sinala que a diferenza salarial derivada do salto de categoría suporía uns 7.500 euros brutos anuais por persoa, pero cre que a cuestión é de prioridades orzamentarias. “O incremento salarial na promoción doutras figuras, como de titular a catedrático, é similar”, argumenta.
A mobilización deste venres busca visibilizar as demandas dun colectivo que considera fundamental para garantir o relevo xeracional na USC e mellorar as condicións laborais e a calidade docente na institución.