A Asociación Área Empresarial do Tambre (AAET) anunciou que o vindeiro xoves, 9 de xaneiro, a unidade móbil da Axencia de Doazón de Órganos e Sangue (ADOS) estará no Polígono do Tambre para realizar unha nova campaña de recollida de sangue.
O autobús de doazón situarase na entrada da explanada da Asociación, fronte á antiga fábrica de Donut. Os horarios para participar serán de 9:30 a 14:30 horas e de 15:30 a 21:00 horas. Para facilitar o acceso, a AAET destaca que as persoas que acudan en coche poderán estacionar comodamente na explanada próxima á unidade móbil.
Desde a organización sublíñase que o proceso de doazón é rápido, cunha duración aproximada de 15-20 minutos. Este xesto solidario é crucial para garantir o mantemento da actividade asistencial, incluíndo tratamentos médicos e intervencións cirúrxicas.
CHAMAMENTO Á SOLIDARIEDADE
A AAET fai un chamamento a empresarios, traballadores e persoas vinculadas ao polígono para colaborar nesta acción solidaria. ‘Levamos máis de 25 anos traballando con ADOS para facilitar estas campañas na nosa área empresarial. Este tipo de iniciativas son esenciais para a sociedade e dependen da colaboración de todos’, afirmou un representante da Asociación.
A campaña, como en anteriores ocasións, busca sensibilizar sobre a importancia da doazón de sangue, un recurso imprescindible para a saúde pública.
