A poucos días do inicio do novo curso escolar, os centros educativos de Santiago de Compostela están a someterse a diversas obras de mellora financiadas pola Xunta de Galicia. En total, destinaranse 377.000 euros a 15 actuacións en 13 colexios e institutos da capital galega, enmarcadas dentro do Plan de Benestar e Accesibilidade na Escola, BEN_Estar 2024 da Consellería de Educación.
A obra de maior envergadura levarase a cabo no IES Arcebispo Xelmírez II, onde se destinarán 84.807 euros á mellora da rede de saneamento, o que representa o 22,5% do orzamento total asignado. Outras intervencións destacadas inclúen o CIFP Compostela, que recibirá 48.000 euros para traballos na fachada, e o CEIP Pío XII, onde se repararán os aleróns por un importe similar.
Tamén se acometerán importantes melloras no IES As Fontiñas, coa reparación do revestimento da cornixa por 37.000 euros, e no CEIP de Vite I, onde se investirán 30.000 euros na reforma da instalación de fontanería. Ademais, o IES de Sar verá reformadas a cuberta dos vestiarios e a fachada do pavillón, así como a construción dunha rampa no ximnasio, cunha inversión total que supera os 35.000 euros.
O IES Lamas de Abade tamén se beneficiará destas actuacións, cunha partida de máis de 25.000 euros destinada á cuberta do edificio de talleres de peiteado.
Intervencións menores pero igualmente necesarias levaranse a cabo no IES Eduardo Pondal e no CEIP Mestre Rodríguez Xixirei, onde se investirán 15.000 euros en cada centro para mellorar o pavillón e adaptar un aseo, respectivamente. Ademais, no CIFP Politécnico de Santiago proseguirase coa impermeabilización dos talleres, cun custo de case 13.000 euros, e no CEIP Cardeal Quiroga Palacios instalaranse vinilos protectores de radiación solar por 10.000 euros. Outras melloras menores están previstas no CEIP de Roxos e no Centro de Educación Especial A Barcia.
A Consellería de Educación tamén confirmou que algunhas das obras previstas no verán pasado, como a instalación dun ascensor no IES San Clemente, están actualmente en execución e se prevé que rematen antes do inicio do curso, aínda que a instalación do ascensor terá que agardar un pouco máis.
AMPLIACIÓNS E OUTRAS ACTUACIÓNS MAIORES
Ademais das reformas en curso, outros catro centros educativos en Santiago están a ser obxecto de intervencións de maior envergadura, cun investimento total de 3,5 millóns de euros dentro do Plan de Nova Arquitectura Pedagóxica. A maior parte deste orzamento, 3,1 millóns de euros, destínase á ampliación do IES Eduardo Pondal, cuxa adxudicación está prevista para finais de setembro ou principios de outubro, co inicio das obras en novembro.
Por outra banda, o CEIP López Ferreiro verá mellorada a accesibilidade e eficiencia enerxética, aínda que as limitacións do PXOM de Santiago atrasaron a instalación dunha nova cuberta de acceso. En cambio, a Xunta ten luz verde para substituír o muro cortina na fachada este.
Finalmente, no CEIP Raíña Fabiola acometerase a substitución parcial do peche da parcela por case 72.000 euros, e no CEIP Plurilingüe de Vite investirase en mellorar a pasarela e as rampas con 118.000 euros.
