A Federación Galega de Asociacións en Favor das Persoas con Discapacidade Intelectual ou do Desenvolvemento (FADEMGA) recibiu esta mañá a visita do Secretario Xeral de Emprego e Relacións Laborais, Pablo Fernández López, nas súas instalacións do Polígono do Tambre en Santiago de Compostela. Esta visita enmarca a presentación da nova convocatoria dos Programas de Cooperación da Consellería de Emprego, Comercio e Emigración para o ano 2024, cuxas bases foron publicadas recentemente no Diario Oficial de Galicia.
FADEMGA, que solicita estas axudas desde 2007, é unha das entidades que se beneficia destes programas, destinados a financiar a contratación de persoas desempregadas para a realización de servizos de interese xeral e social. Durante estes 17 anos, a entidade recibiu un total de 154 contratos, co obxectivo de mellorar a empregabilidade das persoas contratadas e de realizar tarefas de utilidade para a comunidade.
Desde 2013, 18 contratos foron para persoas con discapacidade intelectual. Na última convocatoria, correspondente a 2023, FADEMGA suscribiu 9 contratos, dos cales 3 foron para persoas deste colectivo. O Secretario Xeral de Emprego aproveitou a súa visita para conversar con algúns destes traballadores e percorrer as instalacións da entidade, acompañado por Carmen Taboada, Carmela González, Manel Fernández, Manuel Carrillo e Javier García.
FADEMGA non está soa neste esforzo; 30 das súas entidades federadas tamén recibiron axudas, contabilizando un total de 1.655 contratos en 17 anos, e 81 contratos neste ano 2023. Así, coas 154 axudas de FADEMGA, o total de contratos financiados nos últimos anos ascende a 1.809.
