As traballadoras das tendas Women’Secret da provincia da Coruña volveron a tomar as rúas de Santiago este venres para denunciar “a precariedade laboral” dos seus postos de traballo, nunha folga convocada polos tres sindicatos con representación no comité provincial (CIG, UGT e Fetico). A presidenta do comité, Silvia Lolo, declarou que “a concentración tamén persegue reivindicar a falta de persoal“, o que ven como “un impedimento” para que poidan realizar con normalidade as súas xornadas de traballo.
“As mozas non poden collerse ningún día de asuntos propios, non poden ir ao baño, coller as súas licenzas e teñen problemas para coller vacacións”, afirmou. Entre as protestas das traballadoras tamén figuran as diferenzas salariais en comparación con outras tendas do grupo, que as encargadas non poidan cobrar un plus de responsabilidade e as condicións dos seus contratos. Nas súas declaracións, Lolo afirmou que “ante a negativa de diálogo da empresa” convocarán futuras manifestacións. “Faremos unha asemblea con todas as traballadoras en vista de que non hai solución por parte da empresa. Entre todas decidiremos as medidas a adoptar nun futuro”, engadiu.
