Santiago de Compostela converterase durante tres días nun punto de encontro para responsables municipais, especialistas e entidades vinculadas á participación cidadá coa celebración do VIII Encontro Ibérico de Orzamentos Participativos, previsto para os días 9, 10 e 11 de novembro. A concelleira de Dereitos e Servizos Sociais, Promoción Económica e Xuventude, María Rozas, presentou este martes un avance da programación acompañada de Maica Freire, integrante da organización, e Manuel Fernández, técnico municipal.
O encontro reunirá na capital galega preto de medio cento de relatores e representantes de municipios de España e Portugal, ademais de especialistas internacionais en democracia participativa. A programación distribuirase ao longo de tres xornadas con paneis, mesas de debate, relatorios e obradoiros formativos centrados nas dificultades e posibilidades que afrontan actualmente os procesos de participación cidadá.
Rozas vinculou a elección de Compostela como sede coa recuperación neste mandato dos orzamentos participativos na área de Xuventude. Segundo explicou, o Concello pretende aproveitar a cita tanto para dar a coñecer a experiencia desenvolvida na cidade como para coñecer modelos aplicados noutros territorios. “É unha oportunidade para aprender”, sinalou a concelleira, que defendeu a necesidade de consolidar ferramentas que permitan á cidadanía intervir nas políticas públicas máis alá dos procesos electorais.
Entre os asuntos que se abordarán figuran a desafección política, a transformación dixital, a incorporación da infancia e das persoas maiores aos procesos participativos, as novas tecnoloxías e o impacto da desinformación. O encontro está organizado desde a Concellería de Xuventude xunto co Observatorio Internacional de Democracia Participativa, Coglobal e a Rede de Autarquías Participativas Portugal Participa.
REPRESENTANTES MUNICIPAIS E EXPERTOS INTERNACIONAIS
A programación contará con experiencias procedentes de concellos como Barcelona, Logroño, Alcoi, Cartaxena, Sant Cugat del Vallès, Torres Vedras e Cascais, entre outros. Xunto cos representantes institucionais participarán especialistas universitarios, entidades sociais e profesionais relacionados coa democracia participativa, que analizarán os distintos modelos implantados e os retos que presentan estas ferramentas.
O relatorio inaugural correrá a cargo de Diana Dayer, integrante da xunta directiva de People Powered e responsable de participación cidadá da Fundación Corona de Colombia, ademais de profesora da Universidade dos Andes. Rozas destacou a súa experiencia en iniciativas públicas e privadas relacionadas co fortalecemento dos mecanismos de participación.
Tamén están previstas as intervencións de Luís Cordeiro, da plataforma dixital Coparticipation OneSource; Oliver Escobar, da Universidade de Edimburgo; e Adrián Bua, da Universidade Pompeu Fabra. No apartado institucional participarán, entre outros, o secretario de Estado de Xuventude e Infancia, Rubén Pérez, e a directora xeral do Instituto da Xuventude, Margarita Guerrero, así como representantes portugueses vinculados ás redes de participación municipal.
O congreso estará aberto á cidadanía, aínda que será necesario inscribirse previamente debido á existencia de actividades cun número limitado de participantes, como os obradoiros formativos. Maica Freire explicou que a convocatoria está dirixida a cargos electos, persoal das administracións locais, comunidade universitaria, investigadores e público xeral. Manuel Fernández incidiu, pola súa banda, na oportunidade de coñecer perspectivas galegas, estatais e portuguesas e experiencias de municipios cunha longa traxectoria neste tipo de procesos.
ROZAS VINCULA A PARTICIPACIÓN CIDADÁ COAS MOBILIZACIÓNS POLA VIVENDA
Ao remate da presentación, María Rozas aproveitou a temática do encontro para referirse ás mobilizacións pola vivenda que tiveron lugar nos últimos días en Santiago, entre elas as concentracións na Alameda e na estación intermodal deste pasado luns. A concelleira considerou estas protestas outra expresión da participación cidadá e situou o acceso á vivenda entre os principais problemas sociais que deben afrontar as administracións.
Rozas defendeu a posición de Compostela Aberta de considerar a vivenda como un dereito que debe ser accesible e sinalou que o Concello leva anos adoptando medidas para limitar o uso turístico dos inmobles. Tamén reclamou unha maior intervención das diferentes administracións e dirixiu especialmente as súas demandas á Xunta, como administración con competencias autonómicas nesta materia.
A concelleira referiuse en concreto ás 24 vivendas construídas en Lamas de Abade e considerou insuficiente ese volume de promoción pública ante as dificultades actuais de acceso á vivenda. “As administracións públicas teñen que estar á altura para atender esta situación”, afirmou Rozas, que reclamou incrementar o parque público e sostivo que a vivenda “non pode ser un negocio de fondos financeiros”.
