A Cámara de Comercio de Santiago de Compostela fixo un chamamento ás empresas de Santiago e da súa área de influencia para participaren no “I Barómetro Empresarial de Santiago e a súa Área de Influencia“. A iniciativa, impulsada por Grupo Fisela, coa colaboración da Cámara de Comercio de Santiago e Santiago en Vivo, nace co obxectivo de coñecer a realidade do tecido empresarial a través da experiencia e da visión das empresas.
Neste sentido, explicaron as entidades nun comunicado, o Barómetro permitirá obter unha visión global da realidade empresarial a partir da información achegada por empresas de distintos sectores e tamaños. Así, o estudo abordará aspectos como a actividade económica, o emprego, a captación de talento, a innovación, a transformación dixital, a sostibilidade ou a percepción da contorna empresarial, ofrecendo unha fotografía rigorosa do momento que vive o tecido económico do territorio.
Na actualidade, o traballo de campo xa está en marcha e permanecerá aberto ata o 30 de setembro de 2026 mediante un cuestionario anónimo e confidencial. Segundo aseguraron, toda a información será tratada de forma agregada e con fins exclusivamente estatísticos, “garantindo en todo momento a confidencialidade das empresas participantes”.
Unha vez rematado o proceso de recompilación da información, Grupo Fisela elaborará o informe coas principais conclusións do estudo, identificando tendencias, fortalezas, desafíos e oportunidades para o tecido empresarial do territorio. Con todo, os resultados presentaranse nun encontro empresarial previsto para o próximo mes de novembro, que reunirá empresas, institucións e axentes económicos para compartir unha visión actualizada sobre a realidade empresarial da zona.
Para a Cámara de Comercio de Santiago, dispoñer dun coñecemento preciso sobre a situación e as necesidades das empresas resulta “fundamental” para “orientar mellor as súas actuacións, trasladar as súas demandas ás administracións e seguir impulsando iniciativas que contribúan a mellorar a competitividade” do tecido empresarial.
