A cidade de Santiago de Compostela acolleu este venres a celebración do Día da Economía Social Galega 2026, unha cita organizada por ForoESGal que reuniu representantes institucionais e do sector para analizar os retos e oportunidades dun modelo económico baseado na cooperación, a participación e o impacto social.
Na inauguración do encontro participaron, entre outros representantes, a alcaldesa de Santiago, Goretti Sanmartín, a concelleira de Dereitos e Servizos Sociais, María Rozas, e o delegado do Goberno en Galicia, Pedro Blanco. Durante as súas intervencións, ambos coincidiron en destacar o papel da economía social como ferramenta para impulsar o desenvolvemento económico ao tempo que se favorece a cohesión social e o benestar colectivo.
A alcaldesa compostelá defendeu que “a chave para que a economía sexa realmente social e realmente transformadora, ten que poñer as persoas no centro”. Sanmartín destacou que a cooperación forma parte da tradición social e económica de Galicia, tanto a través dos traballos comunitarios desenvolvidos historicamente no rural como mediante o movemento cooperativo presente en sectores como o agroalimentario ou o pesqueiro.
A rexedora tamén puxo o foco no peso que teñen as entidades vinculadas á economía social no territorio galego, lembrando que as comunidades e mancomunidades de montes representan unha parte significativa deste tecido. Ademais, sinalou que, segundo o último informe elaborado pola Universidade de Santiago de Compostela sobre o sector, durante 2024 constituíronse case 200 cooperativas en Galicia, o que supuxo arredor do 12 % das creadas en todo o Estado. Tamén salientou que o 45 % das persoas socias promotoras das novas cooperativas foron mulleres.
Durante a súa intervención, Sanmartín reafirmou o compromiso do Concello de Santiago co impulso deste modelo económico, que definiu como unha alternativa baseada na inclusión, na cooperación e nunha concepción máis participativa das relacións laborais.
Pola súa banda, o delegado do Goberno en Galicia, Pedro Blanco, subliñou a capacidade das entidades da economía social para xerar emprego e riqueza sen desvincularse do interese colectivo. Segundo afirmou, estas organizacións constitúen un exemplo de que é posible compatibilizar o crecemento económico coa protección dos dereitos sociais e laborais.
Blanco trasladou o respaldo do Goberno central ao sector e destacou a recente Lei Integral de Impulso da Economía Social, unha norma que, segundo explicou, foi elaborada en diálogo coas entidades implicadas. Entre os seus obxectivos figuran o fortalecemento do emprego de calidade, a promoción da igualdade de oportunidades e o impulso de novas fórmulas organizativas, como as comunidades enerxéticas ou os proxectos de vivenda cooperativa.
O delegado agradeceu tamén o labor desenvolvido por ForoESGal e polo seu presidente, Mino Martínez, na promoción dun modelo económico que definiu como orientado ao ben común e á participación cidadá.
