A concelleira de Turismo de Santiago, Míriam Louzao, trasladou á Xunta a necesidade de concretar compromisos en materia de conectividade aérea, planificación do Ano Santo e colaboración para impulsar a desestacionalización turística na primeira reunión de traballo mantida co director da Axencia de Turismo de Galicia, Xosé Manuel Merelles.
No encontro, no que tamén participaron a xerente de Turismo de Santiago, Flavia Ramil, e a directora de Promoción de Turismo de Galicia, Carmen Pita, o Concello situou como prioridades a captación de novas rutas aéreas, a coordinación institucional arredor do Xacobeo e o apoio autonómico a programas municipais orientados a distribuír mellor os fluxos turísticos ao longo do ano.
Ao remate da xuntanza, Louzao sinalou que o goberno local esperaba resultados máis definidos. “A estas alturas do mandato e tendo en conta a envergadura dos temas que tratamos, esperabamos avances máis concretos na xuntanza de hoxe”, afirmou. A responsable municipal explicou que ambas partes acordaron manter novas reunións para avanzar cara a compromisos máis específicos, especialmente no relativo á participación de Turismo de Galicia en futuras iniciativas de desestacionalización promovidas polo Concello.
Un dos principais puntos abordados foi a conectividade aérea. Segundo trasladou Merelles, a Xunta contempla a sinatura este mesmo ano de convenios cos concellos para favorecer novas conexións, aínda que sen detallar por agora o alcance concreto destes acordos. Neste contexto, Louzao insistiu en que Santiago segue reclamando que o Goberno galego asuma o liderado dunha “verdadeira política aeroportuaria de país”, baseada nunha planificación conxunta para os tres aeroportos galegos.
A concelleira compostelá tamén cuestionou o nivel de implicación económica da administración autonómica neste ámbito, ao considerar insuficientes as achegas previstas en comparación co esforzo realizado polos municipios nos últimos anos. Segundo expuxo, o mantemento da conectividade aérea en Galicia dependeu en boa medida da acción local, polo que reiterou a necesidade dun cambio de enfoque por parte da Xunta.
No relativo ao Ano Santo, outro dos asuntos centrais da reunión, Merelles indicou que a convocatoria da Comisión do Xacobeo poderá ser estudada nos próximos meses, aínda que sen fixar unha data concreta.
Por outra banda, o Concello avanzou que xa está a deseñar actividades específicas para atraer visitantes fóra das tempadas de maior afluencia, unha estratexia para a que solicitou respaldo autonómico. Segundo Louzao, esta proposta foi inicialmente ben recibida pola dirección de Turismo de Galicia.
A edil subliñou ademais que Santiago, como principal porta de entrada turística de Galicia, debe manter unha relación fluída e estable coa administración autonómica, tanto polo peso da cidade no sistema turístico galego como pola relevancia estratéxica dos retos compartidos.
