O Grupo Municipal Socialista no Concello de Santiago instou ao goberno local a abrir un proceso de negociación co conxunto das forzas políticas para determinar o destino de máis de cinco millóns de euros procedentes da venda de parcelas de titularidade municipal. A petición foi trasladada pola concelleira Marta Abal nunha rolda de prensa na que advertiu da relevancia desta contía e da necesidade de actuar con “responsabilidade institucional e transparencia”.
Segundo explicou Abal, estes ingresos estaban inicialmente previstos no orzamento de 2025 para financiar distintos proxectos, como a adquisición de inmobles ou a posta en marcha dunha cociña central municipal. Porén, ao non se materializar os ingresos nese exercicio, decaiu a vinculación legal que obrigaba a destinalos a esas finalidades concretas, o que abre a porta a que o goberno local poida decidir o seu uso mediante modificacións orzamentarias.
A edil socialista sinalou que esta situación permite ao executivo dispoñer dunha “marxe discrecional” para asignar os fondos, aínda que lembrou que se trata de recursos procedentes de patrimonio público. Neste sentido, advertiu de que “estamos a falar de máis de cinco millóns de euros que son propiedade de todas as santiaguesas e santiagueses” e que, polo tanto, o seu destino debería ser acordado de maneira colectiva.
Abal criticou que, ata o momento, non se fixo pública ningunha asignación concreta destes ingresos, a pesar de que o grupo socialista solicitou información ao respecto. Tamén cuestionou a xestión municipal en relación con investimentos previstos en anos anteriores, como a adquisición de inmobles, poñendo como exemplo a operación da Casa de Mazarelos, que non chegou a materializarse.
Ademais, apuntou a posibles cambios nas prioridades do propio goberno local, como no caso da cociña central, un proxecto para o que se reservara un millón de euros e que, segundo indicou, non se prevé necesario ata finais de 2028. Para o PSdeG, esta circunstancia reforza a necesidade de revisar o destino dos fondos e adaptalo ás necesidades actuais do municipio.
A concelleira insistiu en que “os recursos non poden quedar parados no banco” e defendeu que deben empregarse para atender demandas urxentes de investimento, especialmente nun contexto no que, segundo indicou, o orzamento de 2026 contempla unha redución das previsións neste ámbito.
Por todo isto, o grupo socialista levará ao pleno municipal unha proposta para instar ao goberno a iniciar un proceso de diálogo co resto de grupos da corporación, co obxectivo de acadar un acordo maioritario sobre o destino destes fondos e establecer prioridades compartidas para o seu uso.
