Os concellos cunha base media de cotización máis elevada foron Oleiros, Santiago de Compostela, A Coruña e Bergondo, segundo os datos que publica este venres o Instituto Galego de Estatística (IGE). En xuño de 2025, había 829.151 afiliados á Seguridade Social con residencia en Galicia que cotizaban no réxime xeral, un 2 % máis que o mesmo mes de 2024. A base media mensual de cotización situouse nos 2.103,1 euros por persoa en xuño, un 3,9 % máis. A dos homes foi de 2.262,1 euros, 313,1 euros superior á das mulleres.
Por outra banda, tamén segundo datos que publica este venres o IGE, a 31 de outubro había 1.026.641 afiliados ao sistema da Seguridade Social con residencia en Galicia. En outubro, os estranxeiros afiliados incrementáronse un 14,7 % con respecto a outubro do ano pasado e o número aumentou nos sete grandes concellos en evolución anual. O maior incremento produciuse en Ferrol e Ourense. Así mesmo, as afiliacións incrementáronse no sector da construción (2,2 %) e diminuíron na agricultura e a pesca (-1,8 %).
