A deputada socialista Patricia Iglesias acusou este luns á Xunta de Galicia de ser a responsable do retraso na ampliación do polígono industrial da Sionlla, en Santiago de Compostela, e de intentar “desviar a culpa” cara ao Goberno central. Segundo explicou, a documentación oficial desmente esa versión e amosa que a demora se debeu á propia administración autonómica.
Iglesias detallou que o Ministerio de Transportes, a través do departamento de Autoestradas, solicitou información complementaria á Xunta o 23 de maio de 2025, mais esta non foi remitida ata o 2 de outubro, coincidindo coa comparecencia da directora xeral de Solo Industrial no Parlamento. “Perdéronse cinco meses por culpa da incompetencia da Xunta”, afirmou a deputada, quen acusou o Executivo galego de “culpar a outros do atraso”.
A parlamentaria do PSdeG sostivo que o proxecto de ampliación “está parado porque Xestur e o Goberno galego non fixeron os deberes”, e advertiu de que “as empresas que queren instalarse en Compostela seguen esperando por solo industrial, porque xa non hai”.
Iglesias lamentou que a falta de planificación estea a frear o desenvolvemento económico de Santiago e reclamou maior axilidade na tramitación dos proxectos estratéxicos. “Menos propaganda e máis traballo, menos mentiras e máis transparencia. Galicia non pode avanzar con gobernos que manipulan e esconden a verdade”, concluíu.
