O Concello de Santiago vén de anunciar unha nova convocatoria dos Bonos Corazón, o programa municipal de estímulo ao consumo local, cun orzamento de 300.000 euros que se suman aos xa repartidos na primeira quenda de maio. En total, o Goberno local destina 600.000 euros a este plan ao longo de 2025, o que supón 150.000 euros máis ca no ano anterior.
A concelleira de Dereitos e Servizos Sociais, Promoción Económica e Xuventude, María Rozas, explicou que as bases da convocatoria xa foron publicadas no Boletín Oficial da Provincia e detallou os prazos de adhesión e participación. Rozas lembrou que “foi o propio tecido comercial o que demandou realizar dúas convocatorias anuais”, co obxectivo de dinamizar as vendas en períodos menos favorables para o sector.
Na edición de maio, os Bonos Corazón permitiron mobilizar preto dun millón de euros nos establecementos locais, con 15.000 bonos descargados, o que, segundo Rozas, “demostra o éxito e a utilidade desta ferramenta de apoio ao comercio de proximidade”.
Os establecementos comerciais e hostaleiros interesados poderán adherirse á campaña a partir do próximo luns e durante un mes, mentres que as persoas usuarias poderán descargar os bonos desde o xoves, ás 09:30 horas, ata esgotar o crédito dispoñible. O prazo para utilizar os bonos será tamén dun mes, e os non trocados caducarán automaticamente ao rematar ese período.
Como nas edicións anteriores, os Bonos Corazón serán dixitais, cun código QR integrado na aplicación Wallet, e poderán empregarse nunha ou varias compras. Haberá unha única modalidade de bono de 50 euros, dos que o Concello achegará 20 euros e a persoa solicitante os 30 restantes. Cada usuario poderá descargar ata tres bonos.
As bases establecen tamén un límite de gasto por establecemento de 15.000 euros, correspondente ao 40% da achega municipal.
Con esta segunda convocatoria, o Concello busca reforzar o consumo no pequeno comercio e na hostalaría compostelá, mantendo o impulso dun programa que, segundo Rozas, “axuda tanto ás familias como ás empresas locais, xerando actividade económica e fortalecendo o tecido comercial da cidade”.
