O Concello de Santiago levará a pleno unha proposta de ordenanza fiscal que introduce cambios tanto no Imposto de Bens Inmobles (IBI) como no Imposto sobre Construcións, Instalacións e Obras (ICIO).
Segundo explicou o concelleiro de Urbanismo e Vivenda, Iago Lestegás, o recargo no IBI aplicarase só ás vivendas baleiras durante máis de dous anos sen causa xustificada e pertencentes a propietarios con catro ou máis inmobles. O obxectivo, en palabras do edil, é “mobilizar o parque de vivendas existente”. Para facelo efectivo, o Concello deberá elaborar un censo de inmobles desocupados, apoiándose en datos de consumo e no padrón municipal.
No capítulo de bonificacións, a ordenanza prevé estender as reducións ás Vivendas de Promoción Pública (VPP), que se sumarán ás xa vixentes para as Vivendas de Protección Autonómica (VPA). Así, todas as vivendas protexidas terán un desconto do 50% no IBI durante os tres primeiros anos. Posteriormente, as VPA manterán un 35% de redución durante dez anos e as VPP un 45% no mesmo período, sempre que se manteñan en titularidade pública e destinadas ao alugueiro.
Tamén no ICIO se aplicará a ampliación da bonificación do 50% das VPA ás VPP. Ademais, as obras declaradas de especial interese ou utilidade social poderán beneficiarse de reducións de ata o 95%, co fin de promover a rehabilitación de edificios catalogados, tanto no casco histórico como no resto da cidade.
A maiores, a bonificación de ata o 95% estenderase ás VPA con cualificación permanente, ás VPP en solo de núcleo rural ou urbano e en ámbitos urbanizados sen completar, así como ás construcións residenciais promovidas por cooperativas de vivenda en cesión de uso sen ánimo de lucro.
