A Aula Magna da Facultade de Química da Universidade de Santiago acollerá o 26 de setembro, desde as 10:00, a VII Feira de Outono das Emprendedoras de Compostela, un encontro que busca xerar un espazo de coñecemento, debate e inspiración arredor da innovación, a saúde e a sustentabilidade, coa igualdade e os valores feministas como eixo.
O acto inaugural contará coa presenza da tenenta de alcaldesa, María Rozas, do director da Área de Valorización, Transferencia e Emprendemento da USC, José Luís Villaverde, e do decano da Facultade de Química, Jesús Sanmartín Matalobos.
A sesión da mañá abrirase cunha mesa redonda sobre o entorno médico e científico e a economía ao servizo da saúde, coa participación de Susana Torrente Vilasánchez (USC), Carme Pampín (Galchimia), Nieves Rodríguez Brisaboa(Asociación Larlilás) e María Seoane Ramil (Bioga).
A continuación terá lugar un debate centrado na saúde mental, no que intervirán Noelia Villaverde Rozas Latento(Servizo Integral Altas Capacidades), Area López Varela (FEAFES), Taida Sánchez Rego (AGADEA), Mª Carmen González Hermo (Colexio Oficial de Psicoloxía de Galicia) e a psicóloga infantil Violeta Cruz.
Xa na tarde, a programación continuará cunha mesa sobre alimentación consciente, deporte e benestar, con voces de ámbitos diversos: a creadora dixital Nuska Chousa, o director de proxectos de Lucía Freitas, Toni Fernández, a cofundadora de Tastelab, Maruxa García Quiroga, a adestradora persoal de Reset, Uxía Parcero, e Noemi Sanmartín Rodríguez Abeiratúa, da Asociación para acompañar procesos de cancro a través do exercicio físico.
A feira pecharase coa presentación do libro Mirar de frente.
