A Xunta de Goberno do Concello de Santiago aprobou a sinatura dun convenio de colaboración coa Asociación Área Empresarial do Tambre (AAET) para o desenvolvemento do Biopolo Sionlla, proxecto coñecido como Polo Biotecnolóxico de Galicia. Neste espazo funciona xa o Centro de Servizos Innovadores para Empresas Biotecnolóxicas (CSIEB).
O convenio enmárcase no chamado Acordo da Sionlla, que agrupa á Xunta de Galicia, ao Concello de Santiago, á Universidade de Santiago (USC), á Cámara de Comercio de Santiago e á propia AAET. A finalidade é impulsar a reindustrialización de Compostela e de Galicia a través da captación de proxectos de investimento e da instalación de novas empresas.
A Secretaría Técnica do Acordo da Sionlla asumirá a coordinación de actividades que permitan reforzar o papel de Santiago como polo industrial e tecnolóxico. Entre as súas funcións están organizar axendas de reunións, elaborar informes, avaliar obxectivos e propoñer novas accións, con especial atención a sectores estratéxicos como o da madeira.
Ademais, prevese o deseño de servizos para facer máis atractivo o Biopolo, a participación en feiras sectoriais, a difusión en redes sociais e a realización de visitas a empresas. Tamén se avanzará na definición dunha fórmula colaborativa para iniciar a primeira fase dos espazos industriais previstos na Sionlla.
O acordo contempla igualmente a coordinación do servizo de vixilancia das áreas empresariais de Tambre, Boisaca, Costa Vella e Sionlla cos organismos municipais, en particular coa Policía Local e os Bombeiros.
Na imaxe de arquivo que acompaña o anuncio, aparece a reunión celebrada en xullo entre o presidente da AAET, José Fernández Alborés, e a concelleira de Dereitos e Servizos Sociais, Promoción Económica e Xuventude, María Rozas.
