Santiago de Compostela continúa a consolidar o seu liderado turístico en Galicia. Segundo os últimos datos publicados polo Instituto Nacional de Estatística (INE), a cidade rexistrou un total de 696.085 estadías nos seis primeiros meses de 2025, o que supón un incremento do 1,6% con respecto ao mesmo período do ano anterior.
A concelleira de Turismo, Míriam Louzao, valorou de forma positiva esta evolución: “A tendencia é ascendente e reflicte que estamos a camiñar cara un modelo turístico máis sostido e beneficioso para a cidade”. Louzao lembrou que xa en 2024 se acadaran cifras récord, polo que este novo crecemento demostra a consolidación de Compostela como destino.
A metade das estadías contabilizadas entre xaneiro e xuño foron de turistas internacionais, cun total de 365.132 pernoctacións procedentes doutros países, unha cifra semellante á do exercicio pasado. En concreto, maio e xuño superaron as 100.000 estadías internacionais cada un, o que reforza o peso deste segmento na dinámica turística local.
Esta presenza internacional ten un impacto directo sobre o gasto medio por visitante. A tarifa media por noite en xuño situouse nos 108,13 euros, un 8% máis que no mesmo mes de 2024. Esta cifra sitúa a Santiago por riba doutros destinos galegos: A Coruña, cunha tarifa media de 79,94 euros, e Vigo, con 77,63 euros.
Louzao destaca que este incremento “non só mellora os ingresos dos establecementos hoteleiros, senón que repercute tamén en sectores como o comercio, a hostalaría e os transportes”. A concelleira insiste na importancia de atraer visitantes que opten por pernoctar na cidade, fronte a modelos baseados exclusivamente en visitas de paso ou estadías curtas.
Os datos comparativos entre cidades galegas reflicten con claridade a posición de Compostela como destino principal: 696.085 estadías en Santiago fronte ás 479.519 da Coruña e ás 372.190 de Vigo no mesmo período.
O goberno local destaca que estas cifras confirman o acerto na aposta por un modelo que busca un equilibrio entre o atractivo turístico da cidade e a calidade de vida da súa veciñanza. A estratexia actual pon o foco na desestacionalización, na promoción de experiencias culturais e patrimoniais e na coordinación co sector turístico e comercial.
A concelleira sinala que os datos do INE “son un estímulo para continuar traballando nun modelo de turismo sustentable, no que Santiago non só sexa punto de chegada, senón tamén espazo de estancia e descuberta prolongada”.
